• Follow us on Twitter
  • Follow us on Facebook

LILIR

Kénging Tiktik Rusyani
Kintun kana Facebook

Euleuh...

Ari  cengkat silalatu rabeng na sirah, panonpoé tunggang gunung

Gening  wanci  geus  sareupna.

Naon atuh nu geus dibuntel keur bekel ?

Unggal rénghap ngan ngitung huap

Unggal kiceup ngan kana karesep,

Dunya nu diudag-udag  tampolana ngan ngabibita.

Sataker  tanaga ngan néangan kasuka.

Naon  atuh  nu rék dibawa keur mulang ?

Kapan unggal usik ngan dosa nu dibeberik.

 

Marken, juli   2011

 

KATUMBIRI

Sirung rarenung na tetelar rasa,

Teuing ti mendi,

Kapan lain wanci,  aya katumbiri nutug kana ati

Rindat jeung réngkak matak salah ngabadé

Kapan lain usum, sab layung geus hibar na langit sore

Aya ku kareueut,

Imut jadi pangirut, sumélékét niruk jajantung

Lir kawisaya ku teuteup munggaran, nu tuluy kamalinaan

Saha atuh éta téh?

Nu tatag ngaboléklakeun tatu  na dada,

Cenah hayang  meupeus hanaang.

Naha deuih,

Diri bét rék serah bongkokan,

Seja muru katumbiri di langit sareupna,

Sok sanajan ngempurna ngan sakedét nétra

Téréh diteleg sandékala

 

Marken,  séptémber  2011

 

LAGU WUYUNG

Pating ronghéap lalakon lawas nu maloncor tina érang-érang lamunan,

Hanjakal

Teu bisa malikan poé katukang,

Basa anjeun nunda carita na salambar keretas kayas,

Basa méméh mulang ngambung  kening , semu nu kagagas,

Bangun nu liwung gandrung,

Kaduhung harita bet ditundung

Ari  sugan rék undur deui  seja  ngajait tina tunggara,

Simpé,  nepi ka wiwilangan warsa.

Kuring ayeuna,

Siga malati pasésaan usum katiga

Nu daunna rawék ku hama, nu kembangna  kapanasan jadi gandola,

Sigana moal lila deui muguran

Tinggal ngaran.

 

Cikolé, september  2011

 

FACEBOOK

Ceuk ki sobat,

Geura buka facebook, tong nyileungleum waé,

Gaul atuh.

Hampura, carita hirup kuring lain keur ditataykeun na leunjeuran kalimah narsis

Bae atuh, ngarah batur apal,

Apanan papada manusa kudu sili tulungan

Teu wasa, nyieun status ngan ungkara hate nu tunggara,

Teu kudu deukeut , bisi milu rudet

Teu kudu nyaah bisi kabawa susah,

Sumpah, euweuh dongeng nu pantes dipidangkeun,

Ayeuna  kuring rek nutup akun,

Ngarah teu talamba tolombo jiga hayam panyambungan,

Lauk buruk milu mijah,

Cag, pileuleuyan, tutup lawang sigotaka.

 

Palataran cafe, juni 2011

Kirim Koméntar tina Facebook

Kirim Koméntar

Jenengan
Alamat Émail
Alamat Wéb
Koméntar
Serat Kodeu: