• Follow us on Twitter
  • Follow us on Facebook

Raja Nusantara Sawala di Tatar Pajajaran

Kénging Ensa Wiarna
Kintun kana Facebook
Mangle
Raja-raja sa-Nusantara karumpul di Tatar Sunda [Potrét/Ilustasi: Ensa]

Raja-raja Nusantara ngumpul di Tatar Pajajaran. Sawala di Gedong Merdeka, Jalan Asia-Afrika, Bandung (9/12).

Pararaja, sultan, jeung pamangku adat  sa-Nusantara ngayakeun  sawala jeung saresehan. Nu hadir, di antarana, ti pulo Jawa, Sumatera, Sulawesi, Kalimantan, Bali, jeung Papua.  Lian ti eta, aya tamu ti Malaysia jeung Brunei Darusalaman. Ti pribumi, nu ngabageakeun teh,  di antarna kulawarag kasultanan Cirebon jeung Sumedang.

Eta kagiatan dialpukahan ku Yayasan Pamanah Rasa Nusantara (Yaparanus). Ketua Umum eta yayasan, Dr. H. Gunawan Undang, meredih sangkan para raja, sultan, katut pamangku adat meunang pangajen nu merenah boh ti pamarentah boh ti masarakat.

Wawangunan kabangsaan, ceuk ieu stap ahli DPD RI teh, teu tuna tina ketak jeung kalungguhan para raja katut sultan. Lantaran, enas-enasna mah, ngahijina rahayat Nusantara  ngaku sabangsa teh, deuih lantaran ketak para raja jeung sultan tea. Hartina,  NKRI ge lain ukur lantaran Sumpah Pamuda, tapi oge lantaran peran  raja di masarakat masing-masing.

Nara sumber sawala, Prof. Dr. H. Muhammad Surya (Anggota DPD RI), Prof. Dr. Hj. Nina Herlina Lubis (Sajarawan), jeung Acil Bimbo (Budayawan).

Dina wawangunan Negara Kesatuan Republik Indonesia (NKRI), para raja jeung sultan jadi pamatri kuatna wawangunan kabangsaan. Atuh, ketak tur paripolahna  dina kahirupan kiwari ge kacida luhur ajenna. Lantaran,  ajen-inajen budaya masarakat masih ngindung kana adat-adatan jeung budaya  nu masih keneh tembres di lingkungan karajaan jeung kasultanan.

Upama raja, sultan, katut pamangku adat, masih keneh gede pangaruhna di masarakat, sawadina oge kudu meunang panalinga ti pamarentah. Memang, cenah, bantuan-bantuan waragad ti pamrentah ge sok aya saperti keur miara karaton katut barang-barang pusakana, ngan tara walatra. Padahal, ceuk Hj. Nina samistina  pamarentah  mere bantuan waragad teh ulah ngan saukur keur raja-raja atawa sultan anu jugala.

Geusan leuwih nembongkeun ketak jeung kalungguhan masing-masing karajaan, Hj. Nina ngajak, sangkan masing-masing karajaan atawa kasultanan sadar kana pentingna catetan sajarah masing-masing. Malah, Hj. Nina ge sadia nuliskeun sajarah raja-raja jeung kasultanan nu aya di Nusantara.

Tumali jeung kalungguhan raja,  Acil Bimbo, ngarasa penting ilu-biungna kulawarga raja dina nyanghareupan kahirupan kiwari. “Bangsa kiwari geus teu puguh paripolahna,” ceuk ieu seniman teh.  Upama kaayaan kitu diantep sakarepna,  bangsa oge bakal leungiteun cecekelan.

Ida Tjokorda Ngurah Jambe Pamecutan, SH., netelakeun  kagitan  sawala kawas kitu, gede mangpaatna.  Lantran, ceuk ieu Raja Denpasar IX teh, masing-masing raja, sultan bisa silih tukeur pangalaman geusan metakeun lengkah tumali jeung karajaan atawa kasultanan masing-masing. Memang, cenah, salila ieu hirup-hirupna karajaan jeunng kasultanan di Nusantara teh teu walatra. Padahal, Ida percaya, masing-masing karajaan boga kalungguhan nu jinek di masarakat. ***

Kirim Koméntar tina Facebook

Kirim Koméntar

Jenengan
Alamat Émail
Alamat Wéb
Koméntar
Serat Kodeu: