• Follow us on Twitter
  • Follow us on Facebook

SERAT JANARI

Kénging Déwi Ratna Damayanti
Kintun kana Facebook

Wilujeng, Jungjunan! Salira nu tos mukakeun panto peuting.
Seja néang takdir anyar, ninggalkeun langit nu geus teu baranang.
Nunda kasimpé. Mugia salira pinanggih kabagjaan. Pid’ua kuring
aya dina dampal salira.

2012

 

GIRIMIS NGEPRIS

Girimis ngepris sésa hujan tadi soré, ngaguratkeun layung
dina tungtung langit. Ringkang Pohaci anteng metik kacapi,
mairan aweuhan lambak nu tingjelegur nganteur tineung.

Bréh jalan nu ngembat, tarahal tur netek. Sorangeun raga urang
nu pasiksak. Tapi anjeun kalah anteng ngagalurakeun rasa. Beuki
rosa mentangkeun kahéman. Najan surti urang hamo tepung
sabab raga bakal ngababatang jadi layon di satengahing jalan.

2012

 

ANJEUN NULISKEUN CARITA

Anjeun hayang reureuh tina sora, tina kelir kahirupan
sanggeus maca ieu raga badag nu taranjang. Jungjunan,
kapan anjeun nu nulis carita luhureunana!

2012

 

CIMATA LANGIT

Séah angin kapireng ngahudang bangbaluh. Nyeuit
ngagerihan haté mangtaun-taun. Hujan lir cimata langit
nu rongkah ngajeritkeun kapeurih.

2012

Kirim Koméntar tina Facebook

Kirim Koméntar

Jenengan
Alamat Émail
Alamat Wéb
Koméntar
Serat Kodeu: