• Follow us on Twitter
  • Follow us on Facebook

Sajak-sajak DJASÉPUDIN

HAREPAN INSAN

Kintun kana Facebook

Ar Rohman duh ngagalindeng

soanten Musya’ari Rasyid

ngaderes na wanci peuting

duh éndah paséhat tajwid

 

Firman téh kaangin-angin

komputer nu ngageleser

nya ayat jadi pépéling

dumadak rasa gumeter

 

tina winém ngabandungan

Ayatulloh dilenyepan

mugi qur’an ngabaturan

nya lampah insan nu iman

Jatinangor, 2010

 

KANYAAH INDUNG

marahmay duh éta raray

nyaputkeun riut karijut

cahyaan duh éta badan

nyumputkeun bangbaluh hirup

 

indung téh teu hungkul ngandung

anjeunna papayung agung

iIndung téh teu hungkul ngaping

ihlasna wening dumeling

Jatinangor, 2010

 

RUPA BAPA

na kumaha rupa bapa?

hayang nyaho ti baheula

na kumaha mun ayeuna?

henteu wasa ngabayangna

Jatinangor, 2010

 

TANGARA

sitincuing ngahariring

sangkuring dikuriling

 

sitincuing pulang anting

sangkuring tigin cicing

 

sitincuing ngajak éling

sangkuring murang-maring

 

sitincuing sepi jempling

sangkuring langlang-lingling

Jatinangor, 2010

 

RITUAL SUBUH

rebun-rebun di pangkalan

nungguan majalah koran

ngimeutan warta poéan

nengetan béja mingguan

 

sugan mah tulisan midang

meunang kuring cacarakan

atawa nu babaturan

rarasaan gegebegan

 

nya reugreug mun kaparegkeun

teu ngareunteut mun nu lian

mungguh kitu pasipatan

kari-kari nunggu giliran

Jatinangor, 2010

 

DINA BIS

dina bis kacida tiris

di luar ngepris miripis

dina bis abdi nunggelis

di luar leuwih ti hinis

Jatinangor, 2010

 

 

WAKIL RAKYAT

carowong heuras genggerong

araksi hayang pinuji

capétang paadu omong

miharep bati jeung géngsi

Jatinangor, 2010

DJASEPUDIN, kolumnis, nganjrek di BOgor

Kirim Koméntar tina Facebook

Kirim Koméntar

Jenengan
Alamat Émail
Alamat Wéb
Koméntar
Serat Kodeu: