• Follow us on Twitter
  • Follow us on Facebook

Sajak-sajak Yayat Hendayana

KU NAON ENGGAL-ENGGALAN

Kintun kana Facebook

Euis Komariah, Euis...

ku naon mulih teh enggal-enggalan, jungjunan

ngantunkeun abdi  sadaya kabungbulengan

Apan urang keur ngarancang pilengkaheun

malar lampah aya tapakna

malar lacak aya urutna

sangkan kabaca ku nu jaga

 

Nanging salira geuning bet mulih ti payun

ngantunkeun abdi sadaya

nu teu terang kedah kumaha

iwal micangcam, iwal midangdam

ka salira nu ngantunkeun pirang-pirang  panineungan

soanten anu halimpu

imut anu ngagelenyu

sanaos nuju haliwu

 

Dina endahna soanten salira, Euis

aya endah Tanah Sunda

dina halimpuna soanten salira, Euis

aya dalingding angin Priangan

tingtrim kana ati

nyeblak kana manah

Di mana-mana aya seungit jenengan salira

nyambuang sapapanjangna

teu laas salalawasna

 

Euis Komariah, Euis...

ku naon mulih teh enggal-enggalan, jungjunan

ngantunkeun abdi  sadaya kabungbulengan

Wilujeng.......

ah, abdi sadaya teu werat

nyebatkeun wilujeng angkat

da salira teu weleh aya

jeroningbatin abdi sadaya

Kirim Koméntar tina Facebook

Kirim Koméntar

Jenengan
Alamat Émail
Alamat Wéb
Koméntar
Serat Kodeu: