• Follow us on Twitter
  • Follow us on Facebook

Catetan Lalampahan

Kénging Shohiba Nu’man
Kintun kana Facebook

Catetan Lalampahan

/1/ Di Taman Mahbaz
 

Nu ragrag palapah korma. Jungjunan
Basa reureuh di korsi taman
Sahandapeun jambatan Mahbaz. Rusras
Ka sagapuy janur di lembur
Basa lulurung Mina

Teu reureuh neureuyan cinta

Talbiyah saha. Jungjunan
Nu ngagero lungkawing dada
Gumuruh. Jadi bingbang nu ngajak mulang
Tapi imah panineungan. Ilang raratan

 

/2/ Boéh Rarang Pangharaman

Boa ngan saukur jadi sajak
Di dieu. Boéh rarang nu meulit ringkang
Balébatan. Ti heumbat niat
Ka heulay rambut pamungkasan
Bati keusik jeung késang. Jungjunan
Basa lapad-lapad tinggurilap
Mawa tibelat. Dina kiswah imah cimata
Laju ngénca. Ngalawan kuriling mangsa  
Saméméh nikreuh ngaderes cinta
Ti pasir Safa ka punclut Marwa
Lalampahan. Nu boa ngaheuleut jarakna

Sab kasono urang. Jungjunan
Panggupay lara nu taya watesna

 

/3/ Madinah Mabra
 

Raray Madinah. Gumebur mabra
Ti rakaat ka rakaat. Ka mana hanjatna
Bati seuneu kumaléntab. Durukan harigu
Nyilalatu. Ngagarang cimata. Manglawas carita

Palebah simpé nu mana. Sakedahna mendak Salira?

Raray Madinah. Soméah
Ti sujud ka sujud. Sumerah. Laju tanggah
Sakeureut simpé nu imut. Neueulkeun curuk
Na biwir langit. Lebah seuseukeut munara masjid

2010

 

Na Panon April

/1/

Juli nyileungleum na panon april
Méijuni silih kiceupan
Lir nyidem rusiah lalampahan
Haté kami ilang rarancang 
Basa agustus sataun katukang
Tacan kénéh ngajéngkat;
Nodongkeun péso halodona
Dina regas tulang iga

/2/

Kari iber nu dipapag na séah angin
Lawas ti lawas, handaru ti pasir kidul
Teu kungsi deui ngapungkeun surat cinta
Séptémber ngutus kekebul
Mopohokeun saban ngaran
Nyésakeun hiji
Na rerengat galengan panineungan

/3/

Basa oktober ngawurkeun kembang,
Urang lawung dina lantip hujan munggaran
Tingpeletékna régang, siki jukut betus harepan
Laju renung sisi walungan
Sapinuh awak ngamaliran
Anjeun jangji:
Micinta kami dina peurih nasib patani

/4/

Novémber neundeun geleger
Oyag mawar handapeun pager
Beueus. Nyeuseup usum jadi sajak
Ti padalisan ka padalisan
Tungtung taun teu weléh ngawujud buku
Nu migambar kukupu

/5/

Tilu pasian bulan. Anjeun ngahiang
Ngabongohan kami nu lali
Ngukur undur kalanggengan
Mopohokeun nasib diri:
Yén hirup patani
Teu leuwih sarénghap hujan

2011-2012


Salira Sajak

Salira sajak. Rusiah nu ngelemeng saeneng-eneng
Lalangsé manglipet kecap. Guligah réngkak
Kasieuh angin kari angin. Tuluy hujan silantangan
Ngahiberkeun surat cinta
Ka lain dayeuh ka lian maneuh
Sanajan jangjang teu weléh pateuh
Sanajan kasurti tarékah kami. Hamo reureuh
Ngulinceran. Lir satelit nu nyiklakkeun
satonggong bulan. Soca salira.

2012

Kirim Koméntar tina Facebook

Kirim Koméntar

Jenengan
Alamat Émail
Alamat Wéb
Koméntar
Serat Kodeu: