• Follow us on Twitter
  • Follow us on Facebook

Gratisan

Kénging Meta Melia
Kintun kana Facebook

Nana : “Ayeuna mah sagala gé kudu ku duit. Euweuh nu gratis..”
Rudi : “Aya aahhh...”
Nana : “Naon?”
Rudi : “Yeuh...” (mikeun leungeun­na anu meureup kana irung Nana)
Nana : “Ka ditu ah... ari geus meguk téh!!!”

Lého
Bapa : “Susut tah lého, geuleuh!”
Budak : “Naon, Pa? Leho?”
Bapa : “Enya.”
Budak : “Bapa mah meuni awas pisan, padahal uing nu boga léhona gé teu sadar mun uing boga lého...”
Bapa : “Burukeun susut!!!!”

Meta Melia
Jl. Banteng No. 122

Torek
Ani : “Mang, Amir aya?”
Mang Otong : “Keur naon kitu?”
Ani : “Iiihh... ari Amir aya, teu?!”
Mang Otong : “Tuh... dina palang-dada semir mah!”

Mita Armita
Parakan Muncang

BBM
+ “BBM naék, cabe naék, béas ogé naék, kabéh sagala nararaék, nepi ka Mang Adang gé milu naék...”
-  “Naha Mang Adang maké naék sagala?”
+ “Pan ku uing ditilah ngala kalapa, tuh ning geus luhur...”
- “Euuhhh.... sugan téh‼!”

Agus Susanto
Jl. Gurame No. 245

Hapé
Aan : “Uing mah boga hapé layar sentuh siah‼!”
Dada : “Komo hapé uing mah leuwih alus tinu manéh!”
Aan : “Hapé naon euy?
Dada :”Hapé déééééééé­éééécchhh...”

Afriliani
Jl. Bima No. 113

Di sakola
Guru : "Dodo...‼! Ku ibu di­perhatikeun ahir-ahir ieu manéh jarang asup! Kunaon?"
Dodo : "Ciéééééé! Ibu meuni perhatosan pisan ka abdi iiih! Bogoh nya bu?" (Bari panonna keukeureceuman kawas nu cacingeun)
Guru : ‼!?!?!?!

Agus Susanto
Jl. Gurame No. 245

Nimu I
Ono : “mang, uing nimu duit 100 rébu..”
Udin : “Wah? Milik tah, nimu di mana kitu?”
Ono : “Tina lomari wa haji...”
Udin : “Euuhh....”

Ridwan Irawan
Jl. Arjuna No. 78

Nimu II
Udin : “Manéh maling sendal uing nya?”
Ono : “Henteu!”
Udi : “Ari éta siah dipapaké?”
Ono : “Da panimu..”
Udi : “Nimu di mana?”
Ono : “Apanan di manéh!”

Ridwan Irawan
Jl. Arjuna No. 78

Kawin
+ Lamun urang parantos nincak déwasa, heug hoyong rumah tangga, omat ulah kawin jeung jelema sa­kampung… omat wé…
- Naha?
+ Kabayang wé sakitu lobana…
- Euuhh… sugan téh

Nana Sukmana
Astana Anyar No. 78

Teguh
Dudu : “Ari Sumpah Pemuda tanggal sabaraha diperingatina?”
Dodo : “Tanggal 28 oktober atuh.”
Dudu : “Ari Sumpah Pocong tanggal sabaraha?”
Dodo : “Eeuuu…”

Nana Sukmana
Astana Anyar No. 78

Kueh Kaleng
Ma Imit kacida atohna, basa anakna balik ti Bandung tos digawe téh, mawa oleh-oleh kueh kaleng sababaraha hiji.
Ngan basa barang dibuka, kacida kagetna, horeng eusi kueh kaleng téh henteu siga dina gambarna, tapi sabangsaning ranginang, opak, wajit.
Sabada ditelek-telek, horeng di Bandungna téh gawena purah ngajaga tokoh kadaharan lembur kitu.

Ami Aminah
Babakan Ciawi
Naringgul – Cianjur

Sieun
Urang ulin yu ka MANGLE !
Embung ah hoream ! Lingku­ngan garalak ka dinya mah!
Wah piraku ?
Enya ! Aya Lodaya, Macan jeung Sancang
Ah siah ! etamah pan ngaran-ngaran jalan !

Apih Suratman
Cimangkok - Sukabumi

Teu dicalana
Naon sababna golek anu diceceb­keun kana gebog mah cicing ari anu dicekel ku Dalang mah teu bisa cicing ?
Pan anu di cekel mah di bojeg­keun ku dalang !
Salah hoyah!
Ari ceuk maneh kumaha ?
Golekna getekeun !
Getek kumaha ?
Enya ! eukeurmah teu dicalana, dikodok ku leungeun dalang !

Apih Suratman
Cimangkok - Sukabumi

Hormat ka Kolot
Kunaon  si eta mah tas maca Fatihah teh tara nyebut amin, kalah  he he he
Pan deukeut akina teu wani da akinna ngarana Amin !
Komo si itu mah mun ditanya 2X3 ngajawabna teh he he he
Naha nya ?
Pan ninina ngarana Enem
Oh ! Hormat ka kolot !

Apih Suratman
Cimangkok - Sukabumi

Nyambut
“Mindeng nyabut huntu teh jadi lemong !”
“Puguh kuring mah nyabut teh kalah ngalobaan !”
“Nyabut naon atuh araraneh teuing ?”
“Nyabut Huissss !”
“Hus siah nyindiran !!!”

Apih Suratman
Cimangkok Sukabumi

Paké Heula
Uing: “Aduh Kang, cing tulu­ngan! Kuring téh rék nginjeum duit 50 rebu mah, keur butuh pisan!”
Akang: “Aya, tapi 100 rebu! Aya teu keur mulanganana?”
Uing: “Gaduh, Kang!” (bari capa-cipi kana pesak).
Akang: “Nya geus wé atuh, pake heula éta, nu jang pamulangan­ana!”
Uing: “???”

Agus B. Irawan
Desa Neglasari
Cisompet – Garut

Kalangkang
“Cing di alam dunya ieu, barang naon nu euweh kalangkangan?”
“Mega lah!”
“Is lain.”
“Alam dunya atuh.”
“Lain, éta ogé.”
“Heueuh, naon atuh?”
“Panonpoe deuleu!”

Ayah Kawunglarang
Rancah 46387

Kaneron
“Aya kaneron Mang?”
“Jang naon kaneron? Kiwari mah geus teu jaman.”
“Keur wadah buku ka sakola, Mang.”
“Euweuh kaneron mah, aya ogé kamerun.”
“Ari kamerun mah ngaran kota di Benua Afrika, Jang!”
“Ah teu puguh si Emang mah ngajawab téh.”
“Sebel atuh, jaman kiwari nanyakeun kénéh kaneron.”

Ayah Kawunglarang
Rancah 46387

PPD
“Cing, singkatan tina naon ari PPD?”
“Pengangkut Penumpang Djakarta.”
“Is, lain…”
“Heueuh singkatan tina naon atuh?”
“PPD téh singketan tina PEngangkut Penumpang Depok!”
“???”

Ayah Kawunglarang
Rancah 46387

Digorolongkeun
“Déwék mah sanggup kénéh naek motor teu dibengsinan.”
“Ari geus maké naon ngahirupkeunana?”
“Nya tinggal digorolongkeun ti Puncak, eureun-eureun di Cianjur.”
“Bener-bener manéh mah nekad hirup téh.”

Ayah Kawunglarang
Rancah 46387

Ngaroko
“Si Abud kamari ka Rumah Sakit! Biwirna beulah, parat nepi kana irung, gara-gara ngaroko!” ceuk si Ibro hariweus­weus, bebeja ka si Sadut sobat medokna.
“Naha kumaha tadina, pangna gara-gara ngaroko biwirna bet bisa nepi ka beulah kitu?” si Dadut tumanya kebek ku kaheran.
“Peuting tadi si Abud nyeu­ngeut pepetasan bari udu! Ruapa­na baé kasalahan tehnis! Ari roko kalah dialungkeun, ari pepetasan kadon dikenyot! Jadi wé ngabeledug dina baham!”

Agus B. Irawan
Desa Neglasari
Cisompet – Garut

Kumpul Kebo
Emangna: “Cing sebutkeun ku naon pangna Alo ayeuna tara daék ari dititah ngangon munding téh!
Alona: “Ah embung wé!”
Emangna: “Enya naon alesan­ana? Wakcakeun ka Emang!”
Alona: “Sieun disarebut kumpul kebo, Mang.”
Emangna: “Lah manéh mah. Geus teu usum deuleu nu kitu mah.”

Izzul
Komplek Vijaya Kusuma
Cipadung - Bandung

Nurutan Kolot
Incu: “Bah cing Ujang ménta bako!”
Abah: “Nanaonan manéh téh budak bet ménta bako!?”
Incu: “Apanan rék ngadu bako di kebon jeung sobat.”
Abah: “Sugan téh rék diajar udud boro moal dibéré.”

Anissa - Subang

Kapireupeunan
Budak: “Ema ari awewe kucap-kiceup wae teh naon hartina?”
Indung: “Bogoheun éta téh ka manéh. Naksir ti dituna mah.”
Budak: “Mun kucap kiceupna teu eureun-eureun jigana bogo­heun pisan nya Ma?
Indung: “Mun kitu mah lain bogoheun ceuk Ema mah, tapi kapireupeunan.”
Budak: “Lah Si Ema mah...”

Anissa - Subang

Sura-Seuri
Emana: “Ku naon manéh téh ti tadi sura seuri waé siga séro?”
Anakna: “Tos nginum, Ema!”
Emana: “Hah? Nginum naon siah. Mamabokan manéh téh?”
Anakna: “Ih Si Ema mah. Lain mamabokan tapi tos nginum temu lawak.”

Izzul
Komplek Vijaya Kusuma
Cipadung - Bandung

Kirim Koméntar tina Facebook

Koméntar (5)

Jefri mans wijaya

Sojo nuju sakola keneh SD latihan mava sunda dinpang meserkeun majalah mangle

trisnie rahayu

upami maos mangle teh emut kapungkur jaman smp sma,pun bapak langannan,upami nembe dugi sok parebut sareng pun bapak,hoyong pang payunna nu maos,abdi mah karesep teh carpon,ayeuna aya mangle online,,,HATUR NUHUN PISAN

calin

heheheheheh

riki

ALHAMDULILLAH AYA MANGLE ON-LINE, JADI INGET KAPUNGKUR WAKTOS PUN BIANG LANGGANAN MANGLE, NU SOK DI AOS RUBRIK BARAKATAK, PANGALAMAN PARAMITRA & CARPON. SUKSES MANGLE.

suci

Hahaha.. Asa waas, jaman kapungkur upami muka mangle pasti pangpayuna rubrik "hahaha sreng barakatak" . Ayeuna tiasa mendakan didieu.. Alhamdulillah,asa ngimpen..hehe lebay.

Kirim Koméntar

Jenengan
Alamat Émail
Alamat Wéb
Koméntar
Serat Kodeu: