• Follow us on Twitter
  • Follow us on Facebook

Daging Sapi

Kénging Rumpaka
Kintun kana Facebook

“Sok sanaos awis pangaosna tapi raos dituangna.”

“Naon téa, Mang?”

“Daging sapi, Lo.”

“Oh.”

“Rupa-rupa kaolahan anu nganggo daging sapi gé rasana raos, Lo.”

“Sapertos baso nya, Mang.”

“Sumuhun.”

“Daging sapi ogé janten salah sahiji sumber protéin anu ageung mangpaatna kanggo awak manusa, Mang.”

“Tuh geuning.”

“Papadaning kitu henteu sakabéhna anu aya dina daging sapi saé kanggo kaséhatan, Mang.”

“Har?”

“Daging sapi téh ogé ngandung lemak tak jenuh anu jumlahna kawilang réa sarta ningkatkeun résiko kangker, Mang.”

“Euleuh geuning.”

“Daging sapi anu teu dipasak kalawan bener bisa ngadatangkeun rupa-rupa kasakit cenah, Mang.”

“Kasakit koléstérol, Lo?”

“Di antarana éta mah, Mang.”

“Ngeunaan kasakit tina daging sapi, Lo….”

“Kumaha, Mang?”

“Horéng lain saukur kasakit jasmani wungkul.”

“Geuning?”

“Daging sapi ogé ngabalukarkeun kasakit ékonomi, Lo.”

“Ah?”

“Misalna baé dina danget ayeuna, ku kajadian mahalna daging sapi ngalantarankeun sababaraha kabutuhan poko milu naraék.”

“Bener, Mang.”

“Lian ti kitu, réa padagang daging sapi anu mogok dagang alatan harga daganganana teu kaharti ku akal tur konsuménna karabur alatan teu kabedag meuli daging sapi.”

“Bener, Mang. Malah industri kadaharan anu bahan bakuna tina daging sapi jeung tina kulit sapi gé réa anu ngajurahroh cenah.”

“Tuh geuning, kaharti ku Alo ogé.”

“Balik deui kana kaséhatan, Mang.”

“Kumaha, Lo?”

“Pikeun anu ompong atawa nu waosna tos seueur nu koropok mah dipahing seueur teuing tuang daging sapi.”

“Heuheuy.”

“Margi bilih nyarelap dina waos sarta teras nyeri waos, Mang.”

“Ih, amit-amit teuing Mamang mah kudu ngalaman nyeri huntu, Lo.”

“Lian ti kitu…”

“Kumaha deui, Lo?”

“Lamun kurang bener atawa kurang lembut ngagayemna daging sapi mah bisa matak bahaya, matak kaseglong.”

“Tah éta ogé aya hubunganana jeung kasakit sosial atawa kasakit moral, Lo?”

“Kasakit moral kumaha, Mang?”

  “Gedéna kauntungan tina bisnis daging sapi bisa ngalantarankeun jalma anu boga kakawasaan kagoda pikeun korupsi atawa narima panyogok, Lo.”

“Kawas nu dipilampah ku salah sahiji pingpinan partéy pulitik nya, Mang?”

“Enya, Lo.”

“Kawasna baé anjeunna téh hoyong énggal-énggal ngaraos nikmatna tuang daging sapi, dugi ka antukna hilap henteu dibeuweung-diutahkeun, antukna janten kaseglong atanapi kabeureuyan.”

“Dikerewed ku KPK nyah, Lo?”

“Enya, Mang.”

“Matak ulah sambarangan tuang-tuang nyah, Lo?”

“Leres.”

“Mun sakalieun kedah tuang daging sapi?”

“Kedah tarapti, Mang.”

“Kudu bener ngagayemna pastina gé.”

“Muhun. Bilih kaseglong atanapi kabeureuyan kéh.”

“Kedah asak-asak ngasakanana deuih, Lo.”

“Leres, Mang. Bilih ngadatangkeun rupi-rupi kasakit.”

“Héhéhé.”

***

Kirim Koméntar tina Facebook

Kirim Koméntar

Jenengan
Alamat Émail
Alamat Wéb
Koméntar
Serat Kodeu: