• Follow us on Twitter
  • Follow us on Facebook

Asét

Kénging Rumpaka
Kintun kana Facebook

“Sok terus jadi lamunan Mamang mah, Lo.”

“Ngalamun naon, Mang?”

“Boga pamajikan téh aya kana dua tiluna.”

“Hus!”

“Ah, naha da Alo pasti sok ngalamun kitu kawas Mamang.”

“Héhéhé….”

“Enya ukur lamunan, pamohalan tinekanan, Lo.”

“Bisa tinekanan, Mang.”

“Wah, naon saratna, Lo?”

“Saratna Mamang kudu boga asét nepi ka puluhan miliar.”

“Walakadalah.”

“Si Bibi, Mang….”

“Pasti bakal protés nyah, Lo?”

“Ih, moal.”

“Wah?”

“Béré wé gedong sigrong, kandaraan méwah, tanah nu ublug-ablag, ngampar nepi ka tungtung deuleu. Béré asét nepi ka muluh miliar.”

“Ambuing.”

“Pamajikan nu kadua, Mang….”

“Kumaha tah?”

“Salian ti dibéré gedong sigrong téh….”

“Béré naon deui?”

“Béré apartemén, mobil méwah….”

“Terus?”

“Salon.”

“Terus naon deui?”

“Jeung sajabana, Mang.”

“Ambuing, Gusti.”

“Tah, ari pamajikan nu katilu, Mang….”

“Pasti kudu dibéré gedong sigrong nyah, Lo?”

“Nya enya atuh, Mang. Da lamun teu kitu mah moal gé daékkeun ka aki-aki kawas Mamang. Mangkaning pinunjul Moka deuih.”

“Beu.”

“Mamang kantun milih badé kulem di mana? Badé di geureuha nu mimti, nu kadua, atanapi badé di nu panganomna?”

“Asa araramis pisan hirup téh, Lo.”

“Hih, tantos baé amis ari pakaya ngagalayah di saban daérah mah.”

“Heueus amisna téh keur Mamang amis dina lamunan hahaha.”

“Heueuh nyah, Mang. Asa teu mungkin Mamang boga asét nepi ka miliran, komo puluhan miliar mah.”

“Enya kapan Mamang mah rahayat, lain pajabat.”

“Pajabat ogé asa pamohalan asétna nepi ka puluhan miliar mah. Komo deui lamun pajabat karir nu gajihna geus ditangtukeun ku nagara.”

“Ah, piraku pajabat teu boga asét nepi ka puluhan miliar?”

“Enya, Mang. Ari pajabatna jujur mah.”

“Ari pajabatna teu jujur?”

“Nya tangtu baé pakayana ngagalayah di saban daérah, hasil tina korupsi téa.”

“Naudubillah himindalik.”

“Modél Djoko Susilo gening, Mang. Pakaya di mana-mana, pamajikan di mana-mana.”

“Ambuing.”

“Kapan nu di Subang gé tanahna wungkul cenah nepi ka aya genep puluh héktarna. Kiwari sakabéh asét atawa pakayana di sita ku KPK.”

“Enya. Da lain pakaya nu manéhna, nu nagara éta mah, Lo.”

“Malah balongna ogé ayeuna mah pada nguseupan cenah ku warga.”

“Iraha, Lo?”

“Ceuk berita sababaraha poé nu kaliwat, Mang.”

“Hih lain ti anggalna ngabéjaan téh Alo mah.”

“Har deuk naon kitu lamun dibéjaan ti anggalna?”

“Deuk milu nguseup.”

“Beu.”

***

Kirim Koméntar tina Facebook

Kirim Koméntar

Jenengan
Alamat Émail
Alamat Wéb
Koméntar
Serat Kodeu: