• Follow us on Twitter
  • Follow us on Facebook

ALUN-ALUN AHAD KAMARI

Kénging Onnok Rahmawati
Kintun kana Facebook

Nekrok sapucuk isuk-isuk na juru alun-alun

Nu  kakabueun ngolotok diharudum halimun

Kaseuseup hawa basajan téh ngan sakedapan

Sésa guher nu kérék jeung nu hudang tineuh

Ngamalir kana subuh nu mancawura na liliran

Saba’da Assalaatukhairuminannauum nyalukan.

 

Sadaray  ibun kalakay handapeun royom caringin

Ngajak mangmata-mata ngulincer ngincer nu muter

Nguiran saguriwek Raflesia nu heurin usik

Antara pulanga ntingna rénghap nu ngarésang

Jeung paanteur-anteur julangna pameuli pamulang

Tina saku déldom ka tukang berby ka tukang tukik

Ka tukang egrang ka tukang lauk bohong

Ka tukang pepelendungan ka tukang pais oncom

Beuki lila pésak-pésak geus alamring ngaripisan

 

Basa ngarérétan juru langit belah kidul

Bulan nyenghel nyeueung dunya nu miheulaan hibar

Jigana bulan gancang pupulih ka sarangéngé

Sabab teu lila si mata poe gura-giru susuay

Arurang nungtutan tingburiak marulang séwang-séwangan.

 

Bumi Kertasari Ciamis

22 February 2013

 

UPACARA

 

Sora tambur ngaweuhan ka beulah wétan

Piit ngabrul kagebah ku handaruan

Kelebet ngeteyep naékan tihang

Indonesia Raya ngulaung

Mumbul ka awang-awang diapung

Indonesai tanah airku

Tanah tumpah darahku

Indonesia raya merdeka-merdeka

Hiduplah Indonesia raya

Na juru alun-alun Aki Suta ingkud

Pejuang tanpa nama

Nu ti waktu ka waktu dirobéda

Ku incok jeung lamur soca

Tur tacan waé merdika

Tina padamelan ménta-ménta.

 

Bumi Kertasari Ciamis

22 February 2013.

 

LAIN SAJAK.

 

Paingan nya, Sayidina Umar mah

Waktos diistrénan janten Amirul Mu’minin

Nu pangpayunna dilakonan teh

Ngalirénkeun putrana tina bandar sapi

Padahal usaha éta nuju mamajengna

Ulah, bisi ceuk batur téh

“Pantes daganganana payu gé

Da putra Amirul Mu’minin.”

 

Bumi Kertasari Ciamis

22 February 2013.

 

DI RUMAH SAKIT

 

Ringkang-ringkang kamelang

Pagulandang di unggal salasar

Kembang harepan ketirna pati pilgenti

Pasesedek minuhan bangsal

Pesak jeung béya remen silih aniyaya.

 

Bumi Kertasari Ciamis

22 February 2013.

 

SONO BERJAMAAH

 

Salira mah salasa menbal baé

Hayuh jumaah nyoo kok jeung rékét

Ngubek lapang futsal saptuna

Ahad énjing numpak kareta mesin

Dinten deui amengan off road

Ahad sanésna tunggang trail

Saba alas muru gunung

Lohor kopong, asar duka di mana

Magrib sareng kalan-kalan

Isya kacapéan, subuh kudu dikukuprak

Nun Gusti, Siti Asiah gé

Boa Saumur na teu diimaman Fir’aon

Geuning bumi alit camperenik di sawarga

Tiasa janten sapaneja tina du’a. Amin.

 

Bumi Kertasari Ciamis

22 February 2013                                                                 

Kirim Koméntar tina Facebook

Kirim Koméntar

Jenengan
Alamat Émail
Alamat Wéb
Koméntar
Serat Kodeu: