• Follow us on Twitter
  • Follow us on Facebook

Lembur

Kénging Basyar Isya
Kintun kana Facebook

peuting ieu bulan ceurik ngabangingik

taya deui teuteup-teuteup tineung

taya deui sawang kebek kamelang

taya deui haleuang rampak,

“Bulan tok! Bulan tok! Bulan sagedé batok!”

taya deui récét barudak ulin galah jeung sondag

: Taya!

 

peuting ieu bulan ceurik ngabangingik

mireungeuh lembur singkur henteu deui

harieum reyem-reyem

mireungeuh manuk bueuk henteu deui

mibanda sora nu mampuh nyiptakeun hiji rasa

mireungeuh mojang-mojang henteu deui

trang-trung nabeuh lisung ti peuting

mireungeuh sagalana baris sirna baris euweuh

: Euweuh!

 

peuting ieu bulan ceurik ngabangingik

neuteup cempor nu nyangsaya ilang daya

na juru kandang domba

deuleu, seuneuna kakalincesan, kakalincesan

: Pes!

 

juruenggon, 1984-2013

 

Silhuét

 

ayun ambing, ayun ambing

ganggayong diri nu pulang anting

dipulangantingkeun angin ti mendi

antara batin jeung diri

ngadingding lalangsé halimun kandel

 

bulan, bulan, cahya anjeun di mana

na sangkeredong atawa keur katalimbeng na guha peteng

ramo-ramo lungsé gupuy-gapay

sedeng silhuét angger ngajauhan,

ngadeukeutan, ngajauhan…

: Ayang-ayangan!

 

juruenggon, 2011-2013

 

Kirim Koméntar tina Facebook

Koméntar (4)

apandi

sae pisan sajakna,punten ijin copas

niskum lanej

barudak ayeuna mah kana PS arulinna teh..teu arapaleun gatrik, rerebonan..

niskum lanej

barudak ayeuna mah kana PS arulinna teh..teu arapaleun gatrik, rerebonan..

ajat sudrajat

Hatur nuhun, sae pisan puisi kenging Kang Basyar Isya. Ngemutan sim kuring ka jaman keur budak, di lembur singkur anu teu weleh jadi bukur catur, katineung nganteng taya kendatna. Basa indung kuring, basa Sunda mugia tetep langgeng dipake jeung dipikareueus ku balarea urang Sunda. Atuh Majalah Mangle mugia tetep mangga pulia, para pangasuhna dipaparin kasabaran, kaihlasan, kaberkahan, seueur rijkina sareng ditebihkeun tina balaina. Aamiin. Hatur nuhun. Salam ti Tangerang

Kirim Koméntar

Jenengan
Alamat Émail
Alamat Wéb
Koméntar
Serat Kodeu: