• Follow us on Twitter
  • Follow us on Facebook

Nyaleg

Kénging Rumpaka
Kintun kana Facebook

“Geus ramé ti ayeuna kénéh.”

“Heuh?”

“Padahal derna sataun deui, taun 2014, Lo.”

“Piala dunia bal, Mang?”

“Is, lain.”

“Har?”

“Ieu mah nu geus ti ayeuna kénéh téh pemilu 2014, Lo.”

“Ramé naonna, Mang?”

“Ramé ku nu nyaraleg kapan.”

“Hih, nya enya atuh kapan pendaptaranana ti ayeuna kénéh ka KPU-na ogé.”

“Heueuh, ngan éta wé ririweuhanana ogé ti ayeuna kénéh deuih.”

“Ririweuhan kumaha, Mang?”

“Hih ari Alo, bet tara merhatikeun berita, kapan diwartakeun dina média massa gé yén di sababaraha daérah aya riributan alatan jagona teu diasupkeun jadi caleg.”

“Aéh enya, nya.”

“Malah aya kajadian nu pikaseurieun, Lo.”

“Pikaseurieun kumaha?”

“Di sababaraha daérah réa nu ribut parebut nomer urut.”

“Parebut nomer nu geus teu kapaké, Mang?”

“His, maksud téh parebut nomer dina pencalonan, urang sebut wé lah nomer gambar calon.”

“Oh.”

“Padahal kapan ayeuna mah nomer gambar calon téh teu pati aya pangaruhna, da nu dipilihna langsung jelemana.”

“Bener, Mang.”

“Padahal nu dicaralonkeun jadi caleg téh jelema parinter, tapi naha bet teu mikir ka dinya nyah, Lo?”

“Hih, ari Mamang!”

“Hih kumaha ari Alo?”

“Kapan ayeuna mah kritéria nyaleg téh lain pinterna.”

“Baruk?”

“Tapi duitna, Mang.”

“Hah?”

“Nyaleg ayeuna mah teu cukup ku idéalisme, tapi kudu dibarengan ku kandel eusi dompétna.”

“Ambuing.”

“Lantaran ayeuna mah para caleg téh kudu ngabiayaan kampanyeu sorangan. Kudu ngayakeun sosialisasi, ngawanohkeun manéh ka masarakat. Tur biaya keur kikituan téh lain bantrak-bantrakeun.”

“Walakadalah.”

“Ceuk béja, cenah biaya pikeun jadi législatip téh ngaratus juta nepi ka ngamiliar.”

“Gusti.”

“Lain biaya nu saeutik, Mang.”

“Nepi ka jor-joran kitu nyah, mémang gedé untungna kitu jadi législatip téh?”

“Meureun, matak wani ngaluarkeun duit gedé gé.”

“Ari keur urang nu milihna, aya untungna, Lo?”

“Wallohualam.”

“Lamun kitu, ayeuna mah législatip téh lain wakil rayat atuh, Lo.”

“Wakil rayat kénéh, Mang, tapi wakil rayat nu beunghar.”

“Atawa wakil artis nya, Lo?”

“Héhéhé.”

“Kaya kitu mah jalma kawas urang-urang geus moal bisa nyaleg, Lo.”

“Tibatan nyaleg, mending kénéh nyiar keur dahar isuk, Mang.”

“Ja heueuh.”

***

Mang Lintrik 

Kirim Koméntar tina Facebook

Koméntar (2)

Aan Hermawan

Upami tos kitu..saha nu lepat? Bade diantep bae sina babalagonjrangan...Nasib bangsa kapayunna teh sanes mingkin sae..!!

heri

leres ...pisan

Kirim Koméntar

Jenengan
Alamat Émail
Alamat Wéb
Koméntar
Serat Kodeu: