• Follow us on Twitter
  • Follow us on Facebook

Garapak Hayam

Kénging Dede Syafrudin
Kintun kana Facebook
Mangle
SN1375271087.jpg [Potrét/Ilustasi: agus mulyana]

“Si Bibina kukulutus, Lo.”

“Kutan, pédah naon?”

“Hayam téh hésé ditéwakna.”

“Beu.”

“Batan beunang mah kalah terus ngagarapak.”

“Lingas nyah, Mang?”

“Enya. Jual mahal tah sakadang hayam téh.”

“Heuheuy, lain jual mahal, Mang.”

“Ari kitu?”

“Béla diri, Mang. Nyingkahan pibalaieun.”

“Lah, teu kudu béla diri sagala da kapan hayam mah kudu tumarima kana nasib dijadikeun deungeun sangu ku manusa, héhéhé….”

“Néangan hayam nu teu lingas atuh, Mang.”

“Nyaéta teu boga deui. Piraku kudu néwak hayam nu tatangga mah.”

“Hus!”

“Heueuh. Ku lieur, ngagarapak baé tah hayam téh.”

“Di pasar atuh néwakna, Mang.”

“Leuwih hésé puguh di pasar mah, Lo.”

“Baruk?”

“Lain saukur ngagarap, tapi ngapung, Lo.”

“Jangjangan nyah hayam téh?”

“Ti baheula gé hayam mah jangjangan. Nu teu jangjangan mah embé.”

“Maksud téh bisa ngapung?”

“Bener, Lo. Ngapung, teu kahontal ku saku masarakat leutik mah.”

“Maksudna?”

“Mahal pisan hargana daging hayam téh, Lo. Bangun anu boga jangjang, ngajaul terus.”

“Oh.”

“Lingasna harga daging hayam téh kawas hayam Si Bibi, Lo.”

“Hésé diaturna nyah, Mang?”

“Enya.”

“Kétang lain harga daging hayam wungkul nu lingas téh.”

“Baruk?”

“Harga kabutuhan poko nu séjénna ogé lalingas, hésé diaturna. Gagarapakan kawas hayam.”

“Lain gagarapakan atuh, Lo.”

“Ari kitu.”

“Ngapung, badis anu jangjangan.”

“Enya, Mang. Cenah mah alatan bulan puasa jeung alatan naékna BBM.”

“Alesan éta mah, Lo.”

“Alesan kumaha, Mang?”

“Alesan ti Bandar anu ngatur harga, sangkan meunang kauntungan anu mangtikel-tikel.”

“Bisa jadi kitu, Mang.”

“Cenah mah, ceuk warta dina tivi, Disperindag Kota Bandung ogé teu walakaya.”

“Teu walakaya meruhkeun lingasna hahargaan?”

“Enya, Lo.”

“Beu.”

“Tah Si Bibina mah lamun hayam lingas téh henteu sumerah kitu baé.”

“Geuning?”

“Si Bibina mah sok laju néangan cara. Saakal-akal, sangkan sakadang hayam katéwak, bisa dperuhkeun.”

“Palébah dinya mah éléh pinter ku Si Bibi nyah, Mang?”

“Lain éléh pinter, Lo.”

“Ari kitu?”

“Éléh tékad.”

“Éléh tékad, kumaha?”

“Si Bibina mah tékadna leuwih kuat, Lo. Jadi wéh uteukna kréatip.”

“Tékad meruhkeun hayam nu lingas, Mang?’

“Ja heuheuh.”

***

Kirim Koméntar tina Facebook

Koméntar (1)

Yedi

Kaharti sawareh

Kirim Koméntar

Jenengan
Alamat Émail
Alamat Wéb
Koméntar
Serat Kodeu: