• Follow us on Twitter
  • Follow us on Facebook

Daun Bulan

Kénging Atep Kurnia
Kintun kana Facebook

Anjeun buru-buru muka indéks dina tungtung buku

Susuganan kekecapan nu ayang-ayangan, dina sela daun-daun

Nu tuluy murudul muru situ nu canembrang kasorot bulan

Anjeun ngitung sakur daun, cara Hayam Canggong dina naskah

Antara bab jeung bab nu ditatab, teu sapat-sapat

Kecap-kecap dina indéks angger teu katara béak

Tuluyna mah anjeun kalah ngalangeu cara Li Po, moho ka bulan

Dangdaunan cul dina padalisan-padalisan nu teu kalisan

 

Cikancung, Désémber 2011

 

Sajeroning Damri

 

Aya nu ngaronghéap, ti lebah korsi nu kosong

rupa-rupa warna, dialeutkeun runtuyan kecap

anjeun nu nangkeup harigu, panon ébat

ku wawadahan warna, nu nalangkar dina dada

ku leungeun nu mimiti ngagarayam kana péna

newakan tingarudatna rupa-rupa warna jalan

 

2011

 

 

Dina Pangdiukan

 

Ratus, malah rébu, tapak leungeun jadi raca

Dina pamuntangan, jeroning nyemprung sajajalan

Angin tiis ngabudal-budalkeun pangalamanana

Dina sirah séwang-séwang. Rérégan biru nyingkab

Ngébréhkeun nu tibuburanjat muru kaguligah

Kolotrak panto beusi muka, sup-sup kana pakarangan

Haté. Ngadon ngalalaran kekembangan pulas jingga

Nu emblog-emblogan, adumanis jeung aksara

Di parapatan, dina pagaliwotana patalimarga

jrut anjeun turun. Mawa pamuntangan

 

2011

 

 

Gupay Angin

 

Di parapatan, nu jalanna mites, anjeun gugupay

Padahal suku masih aya dina tétécéan. Gupay angin

Nu angger bangbaraan patalimarga. Saban gupay

Kudu waé ditungtungan namprakkeun katugenah

Sabab angin tara lirih, nyuay-nyuay saban rupia

 

2011

Kirim Koméntar tina Facebook

Kirim Koméntar

Jenengan
Alamat Émail
Alamat Wéb
Koméntar
Serat Kodeu: