• Follow us on Twitter
  • Follow us on Facebook

Ti Pasir Angin:

Nyorangan

Kénging Arom Hidayat
Kintun kana Facebook

Daun eurih tingarulang

Ngagerihan dampal angin
: Asa geus rintih. Sada saha?
Ngan sada suku luméngkah

Lieuk deui, nu dilieuk geuning euweuh
Sedeng méga beuki hideung
Ningker beuheung

Daun eurih tingarulang
Ngagerihan dampal angin
: Saha nu rintih? Sada saha?
Ngan sada suku lumampah

2013

Garung Dungus

Bubulak geus burak-barik
Jungjunan! Geus dibuburak
Sada akar, sada urat
Sada duriat nu pegat

Jeung angin-angin nu kingkin
Bras ka Pasir Ipis
Jeung implengan saliwatan
Ras ka pager betis

Leuweung nu kamari luwang-liwung
Jungjunan! Geus ngalungkawing
Beuki lewang, beuki lamping
Beuki rumpil keur nu ngeumbing

2013

Catetan ti Batu Lawang
: Gunung Padang

Ka leuweung ka reuma
Jeung carinakdakna dongéng Ema
Bilik carang iga urang
: Geuwat peureum. Ujang, Nyai!

Tuluy keutar tina geutah
Pucuk-pucuk mala
Nu diala
Diamis-amis ku létah

Ti leuweung ti reuma
Jeung carinakdakna dongéng Ema
Peuting rarem langit surem
: Geuwat peureum!

2013

Di Hiji Galéri

Milu keri ka patani
manén katiga nu mangprung
di hiji galéri

Warna haté diulaskeun kana kanvas
siga layung ngolo panon
di hiji galéri

Milu seuri jeung patani
nyeungseurikeun cipanon
nu murag teuing ku naon

2013

Kirim Koméntar tina Facebook

Kirim Koméntar

Jenengan
Alamat Émail
Alamat Wéb
Koméntar
Serat Kodeu: