• Follow us on Twitter
  • Follow us on Facebook

kertas

Kénging Aditia Gunawan
Kintun kana Facebook

pilakadar nilepan kertas jadi parahu

masrahkeun angkleungna kana kamalir cai

kana usum nu dideres cacarakan

kana sawal nu mulangkeun ka sarakan

 

pilakadar nilepan kertas jadi kapal

masrahkeun apungna kana getas jangjang

kana hiuk angin nu haroshos

kana palintangan pamayang

 

pilakadar nilepan kertas jadi lain nanaon

ngalakaykeun pirang-pirang kotrétan lawas

 

2012

 

katineung

atawa urang teundeun

panglawungan urang kana paroman hujan poyan

nu baseuh, haneut, tur caang

laju kuwung-kuwung ngalingkung

mukakeun jalan

 

atawa urang pasrahkeun

gurat leungeun urang kana guguritan

nu dianggit ti bentik langit

sapadalisan-sapadalisan pangumbaraan

 

atawa urang hatamkeun

tadarus tineung ka pipir gawir panungtungan

matak lewang titingalan

 

kamelang kumelendang dina haté nu gudawang

kainggis pras-pris jeroning jamparing girimis

 

2012

 

balabuh

 

panjang sagara lir benang hideung nu dipantengkeun

bulan ririyegan diwelah rayung-rayung pangpung

ngigelan riak-riak cai nu halimpu

ti jauhna, pangjugjugan mirupa guha

dirungkup mangréwu cicika

paeunteung-eunteng jeung sakeprul béntang na langit peteng

manéhna laju ngélébétkeun layar bodas mangsa lawas

nulad lambak nu ngadadak motah

ngajugjug hiji basisir pigeusaneun sadrah

 

2012

Kirim Koméntar tina Facebook

Kirim Koméntar

Jenengan
Alamat Émail
Alamat Wéb
Koméntar
Serat Kodeu: