• Follow us on Twitter
  • Follow us on Facebook

KPPS

Kénging Dede Syafrudin
Kintun kana Facebook

“Beuki deukeut kana waktuna, Mang.”

“Naon téa, Lo?”

“Pemilu législatif, Mang?”

“Oh.”

“Para calon beuki sibuk metakeun jurus pikeun mikat masarakat, Mang.”

“Yaktos.”

“Nu leuwih sibuk mah tangtu baé panitia pemilu.”

“Bener, Lo. Cenah kiwari panitia tingkat désa jeung kalurahan keur sibuk-sibukna ngabentuk panitia penyelenggara pemungutan suara atawa KPPS.”

“Sibuk jeung riweuh deuih, Mang.”

“Har, naha maké ditambahan ku riweuh sagala?”

“Lantaran, ceuk inpormasi nu katarima ku uing, dina ngarékrut anggota KPPS téh kateug ku rupa-rupa aturan, Mang.”

“Baruk?”

“Bener, Mang.”

“Aturan naon, Lo?”

“Di antarana anggota KPPS umurna minimal dua puluh lima taun, sarta pendidikanana minimal SMA atawa sadarajat.”

“Ambuing.”

“Padahal salila ieu, pangpangna di pilemburan, anggota KPPS téh réa anu pendidikanana teu tamat SMA-SMA acan.”

“Bener, Lo.”

“Hal sarupa kitu ngalantarankeun réa anu taluk pikeun ngarékrut anggota KPPS.”

“Hih, ku hésé nyah nyiar lulusan SMA gé.”

“Saenyana réa lulusan SMA gé, ngan geus kapiheulaan dirékrut ku para calon. Lian ti kitu, urang pilemburan anu pendidikanana luhur réa anu ngadon nyiar kipayah di kota tur langka balik ka lemburna. Alatan kitu, jalma pendidikan nu cicing di pilemburan jumlahna jadi kawates.”

“Lakadalah.”

“Pasualan séjén, Mang.”

“Kumaha deui, Lo?”

“Réa warga pendidikan anu api lain kana pemilu. Boro-boro daék jadi panitia pemilu.”

“Makaning aturan anggota KPPS minimal lulusan SMA atawa sadarajat téh geus diterapkeun dina Undang-unda nya, Lo?”

“Enya, Mang. Malah tuluy réa anu apatis. Pokna téh, kajeun teuing euweuh KPPS atawa euweuh pemilu gé, tibatan ribed ku sarat mah.”

“Gawat ari kitu mah.”

“Gawat kumaha, Mang?”

“Lamun pemilu teu jadi dilkasanakeun alatan euweuh panitiana, dipikahariwang bakal aya suasana ririweuhan atawa suasana bingung, tur dimangpaatkeun ku pihak-pihak nu hayang ngaruksak kahirupan démokrasi di urang, Lo.”

“Enya éta nu dipikainggis téh, Mang.”

“Matak ari nyieun undang-undang atawa aturan téh kudu survéy heula ka masarakat, Lo.”

“Hus!”

***

Kirim Koméntar tina Facebook

Kirim Koméntar

Jenengan
Alamat Émail
Alamat Wéb
Koméntar
Serat Kodeu: