• Follow us on Twitter
  • Follow us on Facebook

Persib VS Persija

Kénging Dede Syafrudin
Kintun kana Facebook

“Alhamdulillah.”

“Hih, jol alhamdulillah baé, Lo?”

“Antukna mah bisal dilaksanakeun di Bandung, Mang.”

“Naon téa?”

“Pertandingan Persib ngalawan Persija, Mang.”

“Oh.”

“Lantaran mun bedo maén di Bandung, tangtu Persib rugi, moal bisa ngamangpaatkeun laga kandang.”

“Laga élklasiko disebutna ogé. Nurutan istilah dina liga sepanyol, pertandingan antara Barcelona lawan Real mandrid téa geuning, Lo.”

“Sok panas pertandingan élklasiko mah, Mang.”

“Enya. Tapi di batur mah panasna téh ukur dina pertandingan, ukur di lapangan, Lo.”

“Ari di urang?”

“Panas nepi ka luar lapangan. Malah nepi ka tempat-tempat séjénna nu taya hubunganana jeung pertandingan.”

“Bobotoh silih kakalakeun jeung De Jék nya, Mang?”

“Enya. Nepi ka aya nu jadi korban kapan. Hal éta pisan nu ngalantarankeun pihak kepolisian, sababaraha waktu nu kaliwat, teu ngidinan pertandingan Persib jeung Persija diayakeun di Kota Bandung jeung kota-kota séjénna di Jawa Barat.”

“Bener, Mang. Pacéngkadan antara bobotoh jeung de jék téh bangun nu geus karahaan, hésé pisan diungkulanana. Malah Gupernur DKI jeung Gupernur Jawa Barat ogé nepi ka kungsi madungdengkeun éta pasualan.”

“Ku ayana éta pasualan, Persib téh jadi kabawa rugi.”

“Enya.”

“Kiwari, bobotoh geus jangji bakal tartib. Sarta antukna Persib bisa ngalaksanakeun pertandingan ngalawan Persija di Bandung.”

“Ahamdulillah.”

“Muga-muga baé bobotoh téh beuki déwasa, Mang. Henteu milampah hal-hal anu matak rugi ka saréréa.”

“Enya. Keun baé ari panasna ukur di lapangan mah, da ngaranna ogé hiburan.”

“Kalah jadi leuwih nikmat lalajona nyah, Mang.”

“Nikmat sotéh lamun panasna masih kénéh aya dina koridor sportip. Lamun nu maraénna panas nepi ka buk-bek mah asa nikmat kénéh lalajo tinju.”

“Satuju, Mang.”

“Muga-muga baé bobotoh jeung de jék bisa bener-bener daméy. Sarta engké Persib bisa ngéléhkeun Persija, jeung kleub-kleub lianna, tuluy jadi juara.”

“Amin.”

“Pan nikmat ngabandunganana ogé.”

“Ngabandungan naon, Mang?”

“Ngabandungan bobotoh tartib, Persib juara.”

***

Kirim Koméntar tina Facebook

Kirim Koméntar

Jenengan
Alamat Émail
Alamat Wéb
Koméntar
Serat Kodeu: