• Follow us on Twitter
  • Follow us on Facebook

Genjlong Gunung Ciremai

Kénging Ayie Sundana
Kintun kana Facebook
Mangle
SN1395153225.jpg [Potrét/Ilustasi: ]

Beja nu geus sumebar dimasarakat, perkara Gunung Ciremai di Kuningan Jawa Barat téh geus dijual sarta geus dibeuli ku pausahaan Amerika Serikat nyaeta Chevron Geothermal Indonesia Ltd, nu pangajina nepi ka Rp. 60 triliun.
Malah Chevron dianggap bakal sagancangna ngawangun puseur Pembangkit Listrik Tenaga Panas bumi (PLTP) di gunung nu pangluhurna di Jabar ieu teh.

Saperti anu dikutip dina forumhijau.com anu netelakeun yen Gunung Ciremai geus dijual ka Chevron nu gedena Rp. 60 triliun. Dijualna gunung ieu téh patalina jeung ayana sumber panas bumi, emas jeung uranium.

Proyek Geothermal Ciremai geus positif ti taun kamari. Proyek ieu geus disaluyuan ku gubernur Jawa Barat Ahmad Heryawan sarta ngayakinkeun yen proyek Geothermal di Gunung Ciremai ieu teh “ramah” lingkungan, henteu ngarugikeun masarakat.

Dina “broadcast”, dijentrekeun yen upama Chevron ngaeksploitasi Geothermal, bakal aya balukar anu dirasakeun ku masarakat, diantaranna, kaluarna campuran sababaraha gas saperti karbon dioksida, hidrogen, sulfida, metana, jeung amonia anu pastina bakal ngotoran lingkungan. Pencemaran ieu pangaruhna kana global warming (pemanasan global) jeung hujan asam.

Pangwangunan pembangkit Geothermal, dianggap bisa ngaruksak stabilitas taneuh. Pasokan cai bersih bakal kurang. Malah bakal ngajadikeun gempa minor anu ngabalukarkeun bituna Gunung Ciremai.

Chevron Geothermal Indonesia Ltd ngabantah isu nu sumebar di media sosial anu netelakeun yen Gunung Ciremai, Jawa Barat, geus dijual ka pihakna saharga Rp 60 Triliun.

"Sadaya investor tiasa ngiring tender, Chevron kenging prospek ieu téh ngalangkungan tender terbuka," ceuk Ida Bagus netelakeun.
Manager Policy, Government, & Public Affair Chevron, Ida Bagus Wibatsya ngajentrekeun yen pausahaanana miluan proses tender terbuka anu dilaksanakeun ku panitia tender pamarentah Provinsi Jawa Barat. Korporasina ningali ajen wilayah kerja panas bumi Ciremai mangrupa salah sahiji prospek panas bumi di Indonesia.
Nurutkeun Ida Bagus Wibatsya, Chevron mah ngan saukur meunang tender pikeun ngamekarkeun proyek panas bumi di lokasi gunung Ciremai.
"Ieu sanes hartosna ngagaleuh sapertos anu tos diberitakeun yen pihak Checron ngagaleuh Ciremai" pokna jentre.
Dina mekarkeun proyek panas bumi ieu, Chevron bakal babarengan jeung Badan Usaha Milik Daerah (BUMD) Jawa Barat luyu jeung pasaratan nu dipenta pamarentah daerah. Dumasar kana data Kementerian ESDM, Chevron bakal ngawangun pembangkit listrik tenaga panas bumi (PLTP) anu kapasitasna 2x55 megawatt (MW).

Staf Khusus Presiden Bidang Bencana dan Bantuan Sosial Andi Arief mairan pasualan gunung Ciremai. "Teu aya kawijakan atanapi rarancang program samasakali kanggo ngajual Gunung Ciremai ka Chevron nu hargana Rp 60 triliun," pokna.

Gubernur Jawa Barat Ahmad Heryawan ngabantah isu dijualna Gunung Ciremai ke pihak asing. Ahir-ahir ieu isu dijualna gunung ieu teh geus sumebar pangpangna ngaliwatan internet.
Gubernur negeskeun yen kawasan hutan Taman Nasional di Gunung Ciremai teu meunang dijualan atawa dialihfungsikeun lian ti sektor kehutanan. Nurutkeun Aher, hal ieu luyu jeung SK Menhut 424/2004, ngeunaan penetapan kawasan hutan Gunung Ciremai minangka Taman Nasional.
Heryawan ngajentrekeun, isu pausahaan asing anu bakal ngokolakeun Gunung Ciremai téh bohong. Ayana SK téh lain hartina keur ngabuka pausahaan asing asup, tapi keur ngamumule gunung Ciremai minangka Taman Nasional
Ngaliwatan akun twitter resmina, Heryawan netelakeun ayana sumber kakayaan Geothermal nu aya diluar Taman Nasional. Sakabeh potensi Geothermal ieu aya di luar kawasan Taman Nasional Gunung Ciremai, jadi dimana ieu potensi dimangpaatkeun moal ngaruksak lingkungan.
"Geothermal teh sumber energi listrik anu paling ramah lingkungan, pohara diperlukeunanakanggo urang sadaya," ceuk Heryawan.

Ku ayana energi Geothermal bakal ngurangan katergantungan kana Energi fosil anu teu ramah lingkungan.
Nurutkeun Heryawan, Geothermal téh sabenerna merlukeun kondisi hutan anu kapiara, kusabab gumantung pisan kana “pasokan” cai.
"Geothermal sama sakali henteu ngaluarkeun gas beracun saperti anu tos rame dibewarakeun," pokna tandes.
Pikeun Jawa Barat perkara Geothermal lain perkara anyar, kusabab Jabar boga sababaraha tempat eksplorasi panas bumi, saperti di Gunung Salak, Wayang Windu, Kawah Darajat, Kawah Kamojang, jeung Karaha Bodas Patuha.

"Anu nuju proses di Tangkuban Parahu, Tampomas Sumedang, sareng Cisolok Sukabumi," pokna.
Gubernur oge ngabantah ayana beja yen masarakat bakal digusur upamana eksplorasi Geothermal dilaksanakeun. Soalna, aktivitas Geothermal ieu jauh ti kawasan padumukan warga, malah bakal mere mangpaat keur masarakat. Diantarana saperti; pangwangunan ekonomi, pariwisata, pangwangunan  infrastruktur, jeung lapangan gawe di sabudeureun kawasan geothermal.
Dimana engkena bakal kaluar nu meunangkeun tender, gubernur miharep kakayaan alam ieu digarap ku pribumi lain ku pangusaha asing.

"Di jaman sim kuring aya tilu tender geothermal, nyaeta Tangkuban Parahu, Tampomas sareng  Cisolok. Sadaya nu kenging tenderna teh pausahaan dalam negeri. Kanggo Ciremai, sing saha wae nu kenging kedah tiasa gawebareng sareng BUMD Jabar," ceuk gubernur.

 

Kepala Dinas Energi Sumber Daya Mineral (ESDM) Jawa Barat, Sumarwan HS ngabantah oge ayana transaksi jual beuli gunung Ciremai ka pausahaan asing.
"Éta téh lepat, anu leres mah Chevron téh kalebet pamilon lelang penanam modal atanapi investor PLTP, tender anu izinna oge teu acan ditandatangan ku gubernur," ceuk Sumarwan tandes.
Nurutkeun Sumarwan, hal ieu téh masih ngaliwatan heula proses konsorsium jeung pamilon lokal (dalam negeri). Memang Chevron geus ditetepkeun nu jadi “pemenang” dina taun katukang. Tapi, pikeun ngamimitian eksploitasi, Chevron can nyekel Izin Usaha Pertambangan (IUP).***

Kirim Koméntar tina Facebook

Koméntar (1)

kang Yusuf

ditenderkeun sareng di jual teh hampir adi lanceuk ceuk kuring mah da sami weh nu teu meunang tender mah moal bisa ngala eta eusi gunung..boh gas atawa bahan material lainna, ari nu meunang tenderna chevron...nu bogana urang amerika nya sarua weh jeung dijual ka urang amerika, rahayat mah dibulat belit weh da para inohong mah palinter geningnya

Kirim Koméntar

Jenengan
Alamat Émail
Alamat Wéb
Koméntar
Serat Kodeu: