• Follow us on Twitter
  • Follow us on Facebook

Sumanget Bandung

Kénging Dede Syafrudin
Kintun kana Facebook

“Ampir kapopohokeun, Lo.”

“Naon, Mang?”

“Éta tuda keur meujeuhna ramé ngobrolkeun pemilu.”

“Naon téa nu ampir kapopohokeun téh?”

“Bandung Lautan Api, Lo.”

“Har?”

“Enya. Kuduna mah kapan kamari-kamari urang ngobrolkeun Bandung Lautan Api téh, dina ahir Maret. Ayeuna mah kaburu kaliwat Maretna ogé.”

“Nya teu nanaon kaliwat ogé, Mang.”

“Hih teu puguh atuh, Lo. Kapan éta téh kajadian sajarah anu gadé pangaruhna dina mertahankeun kamerdékaan.”

“Maksud téh lain kaliwat bari dipopohokeun, Mang.”

“Ari kitu?”

“Baé kaliwat waktuna mah, urang obrolkeun wé ayeuna.”

“Obrolkeun ngeunaan naonna, Lo?”

“Obrolkeun ngeunaan sumangetna. Sumanget Bandung Lautan Api.”

“Enya.”

“Ogé pangorbanan para pahlawan ka lemah cai jeung ka rayat, Mang.”

“Diaplikasikeun kana kaayaan jaman ayeuna nyah, Lo?”

“Yaktos.”

“Kana perkara naon?”

“Ulah jauh-jauh, Mang, kana perkara anu ayeuna keur aktual sarta rék disangharepan ku urang saréréa.”

“Kana perkara pemilu, Lo?”

“Enya.”

“Naon nu kudu diaplikasikeunana?”

“Sumanget Bandung Lautan Api téh sing jadi sumanget keur urang Bandung hususna, sarta urang Sunda umum, pikeun milih pamingpin Sunda dina pemilu nu bener-bener nyaah ka masarakat sarta teuneung ludeung ngabéla Ki Sunda di péntas lokal jeung nasional.”

“Hih, kumaha kéh lamun aya nu nuding kesukuan?”

“Teu jadi masalah Mang, da urang mah urang Sunda nyarita ka urang Sunda. Médiana média Sunda nu maké basa Sunda, sarta ningali sagala perkara dina kacamata Ki Sunda. Lamun euweuh kawani tangtu salawasna urang Sunda moal boga pamingpin nu makalangan sacara nasional.”

“Satuju.”

“Pangorbanan pahlawan Bandung Lautan Api ogé kudu diaplikasikeun kana kahirupan ayeuna. Pangpangna keur para pamingpin nu engké kapilih, kudu daék berkorban ka rayat.”

“Satuju, Lo. Ulah salawasna rayat jadi korban para pamingpin.”

“Hus!”

***

Kirim Koméntar tina Facebook

Kirim Koméntar

Jenengan
Alamat Émail
Alamat Wéb
Koméntar
Serat Kodeu: