• Follow us on Twitter
  • Follow us on Facebook

Sinareng Bulan Purnama

Kénging Ano Karsana
Kintun kana Facebook

Kedahna mah ayeuna téh

Susulumputan dina iuh-iuh

Rambut salira

 

Ari ieu apan bulan gé kalangkangna

diheumpikkan poék

 

Purnama anu kedahna ngebra mabra

Diburuan ati. Kusaha dikalangkangan

 

Sanajan mongkléng kacipta upami mareng

salira. Ngangkleung di sagara langit

anu sakitu makplakna. Réma rumaket

guneman sono.

 

Dampal nepakan pingping parahu ngawirahma

Éh, geterna. Éta geterna haté

 

Layar halon helab-helob mungguh antaré

Sindang ti lembur béntang ka pulo béntang

anu ngalamuk nyilaturahmi ka baraya

nu tagen dina kahéman

 

gunung méga nu ngarunggunuk hareupeun

geus kaliwat dilieuk aya tukangeun

 

Ah, salira gumeugeutna geter marengan

ngélébétna layar nu ngerab-ngerab dina

pupundayan rasa. Wangina haréwos

silih témpas jeung ombak nu babalapan

 

Kedahna apan ayeuna purnama nedengna mabra,

Peuting geus anjog ka basisir subuh.

Purnama kapiheulaan fajar

geus tigin. Imutna ngabagéa ti Salira nu seja mikanyaah sapuratina.

18-8-2008

Kirim Koméntar tina Facebook

Kirim Koméntar

Jenengan
Alamat Émail
Alamat Wéb
Koméntar
Serat Kodeu: