• Follow us on Twitter
  • Follow us on Facebook

POTRÉT

Kénging Ari Andriansyah
Kintun kana Facebook

Warnaning kamelang disarigsig pigura lawas

Pulas pias tina rupa nu salawasna nuguran subaya

Aya purnama nyamagaha saban waruga

Aya peteng nalimbeng lolongkrang teuteup

Laju ruruhit wanci nyiriwikkeun céda takdir

 

Nya kami sesebitan potrét rajét

Dina reregas témbok panggantungan sésa hégak

Seuri nu lila lastari, ceurik nu madakeun kasangsri

Ukur kelir lalampahan antara beurang jeung peuting

Antara séwu semu nu langgeng dirurub saru

 

Pulas rupa naon deui nu kudu diranggeuy teuteup

Saban ngaran jeung titimangsa nu kungsi marengan

Ukur latar jisim gambar nu lana kabandang samar

Hideung bodas langit kami kapan saweuyna impian

Dina pigura ringkang nu lawas leungiteun kalangkang

 

Karawang, 2012

 

 

LALAKON

-Surat keur Dadan Sutisna-

 

Dina linting peuting, ungkara urang terus ngelun

Muput lalakon bari teu kendat mareuman kuntung bangbaluh

Sabada raga leuseuh jengkar jeung dijengkarkeun lalampahan

Sabada kayakinan kasoran dikalantang rénghap beurang

 

Kecap-kecap urang ngarayap sapanjang galengan

Nampingan sagebar sumerah nu bangun lana nyaliara

Taun-taun jeung sésa umur nu muguran di unggal dayeuh

Kiwari kari bacacar kalakay luhur panagan

 

Dina linting peuting, kalimah demi kalimah terus nyerebung

Teu suda ngunun saniskara impian dina pirunan kalbu

Urang pasini rék néangan kalangkang jeung tapak suku

Najan sukma beuki liwung ditenung geter halimun

 

Tanjungsari, 2012

 

Kirim Koméntar tina Facebook

Kirim Koméntar

Jenengan
Alamat Émail
Alamat Wéb
Koméntar
Serat Kodeu: