• Follow us on Twitter
  • Follow us on Facebook

ANAKING, 'NA HIJI PEUTING

Kénging Arom Hidayat
Kintun kana Facebook

Dina rencep girimis, Ris!
Urang rajeun nyambat balébat
Ngaliwat, sanggeus kalieus jeung kalinces seuneu damar
Nyaring sapeupeuting maring jempling

Naon bédana urang jeung sajak?
Basa keretas bodas ngan wasa tumamprak
Najan sakumaha mangsi sumiriwik nurih mangsa
Ngan silih téangan lebah, lebah mana hariring
Naha nyelap 'na raga nu amis daging
Atawa dikeukeuweuk nyawa nu gulet tanding jeung wanci?

Pada-pada milang sada
Jero dada sarua saru ku sora jeung sora
Nepika hiji mangsa. Mun dina rencep girimis
Aya kalieus jeung kalinces seuneu damar. Ulah ditiup, Ris!

Hégarmanah, Juni 2012

PADAKASIH-GIRIASIH

Bolégér gawir taneuhna beureum
dina ragas iga-iga leuweung
:tulang mana deui nu rék ditabeuh
mirig dangding ieu dayeuh

Tunggul titinggal tangkal
jeung tapak-tapak nu ngiuhan
geus disasar nepi ka akar nyolongkrong
lir ramo-ramo ngasongkeun kasono

Sajajalan sarénghapan jeung kulutrak jam
nu amit nu uluk salam

Sajajalan ngarénghapan rahuh zaman
jeung ronghéap rénghap jeung laleupas ambekan

Cimahi, Juni 2012

GAWIR WALAHIR

ngan,
suhunan jeung suhunan
nu wekel maruntangan suku gunung
nu ngejat
gudawang dadana beureum, kidang pananjung

wilujeng angkat!

Bandung Barat, Juni 2012

RAWAYAN
:tilam katineung ka lembur peuntas  

Anyaman hinis jeung haté
Ditanya ku dampal suku
Jawabna ngan rekét ditungkulan ku rérét

Aya lolongkrang némbongkeun gurawang kalewang
Disorang ngan ku sorangan

Anyaman hinis jeung haté
Nanya ka dampal suku
Dijawab ku gerét tonggérét dongéngna dongéng samporét

Aya léngkah-léngkah panineungan lalaunan ngajauhan
Ninggalkeun simpé rawayan 

Wangunsari, Juni 2012
 

Kirim Koméntar tina Facebook

Koméntar (1)

alvian kahpi

kataji pisan eta bahasa nete taraje nincak hambalan te sanes bohong,ngadamel deui atuh kang nu sepertos kieu nu langkung panjang

Kirim Koméntar

Jenengan
Alamat Émail
Alamat Wéb
Koméntar
Serat Kodeu: