• Follow us on Twitter
  • Follow us on Facebook

Dokter Jiwa
Nyadiakeun Ubar keur Caleg Gagal

Kintun kana Facebook
Mangle
dr. Teddy Hidayat Sp.KJ.,
Psikiater Di RS Hasan Sadikin Bandung
[Potrét/Ilustasi: ayi]

Dina pemilu 2009, caleg anu karandapan kasakit gangguan jiwa balukar gagal meunangkeun korsi dewan bisa nepi ka angka 100 ribu.

Psikiater Di RS Hasan Sadikin Bandung, dr. Teddy Hidayat Sp.KJ ngaprediksi bakal loba caleg anu stres balukar gagal di pilihan legislatif 2014.

Lian ti faktor lemah mental, gedena karugian material oge jadi salah sahiji panyabab kasakit gangguan kajiwaan para caleg.

“Hal ieu téh kumargi henteu siapna mental dina resiko kawon atanapi teu kapilih, padahal tos seueur ngaluarkeun waragad kanggo ngahontal korsi legislatif,” ceuk Teddy.
Nurutkeun dr. Teddy, tingkat gangguan jiwa anu karandapan ku para caleg ieu rupa-rupa, ti mimiti kasakit jiwa anu leutik nepi ka anu beurat (depresi). Malah bisa jadi para caleg anu kapilih atawa lolos jadi legislatif oge bisa jadi ngalaman kasakit gangguan jiwa. Alesanana nyaeta dina tarekah sangkan bisa mulangkeun deui modal atawa waragad anu geus dikaluarkeun dina waktu keur kampanyeu, boh modal pribadi atawa modal injeuman.
"Gangguan jiwa téh kusabab ayana parobahan sifat,paroman sareng watekna.  Kumargi sateuacan janten anggota legislatif biasana tiasa caket sareng aya perhatian ka masarakat, tapi sabadana kapilih malah sabalikna,” pokna.

Dina Pileg 2009 contona loba pisan caleg anu karandapan kasakit gangguan jiwa. "Memang dina taun 2009 aya sareng mung saukur terapi sacara husus di klinik abdi jumlahna oge teu seueur mung 10 jalmi. Éta téh anu sakaterang abdi, upami anu teu kapendak atanapi memang teu nembongkeun kumargi bilih isin tiasa janten ratusan," pokna deui.

Stres bisa mangaruhan kasaimbangan syaraf otonom jeung ngurangan sistem kekebalan tubuh.

Resiko kasehatan anu ngancam ka para caleg anu gagal tur stres diantarana:
1. Gangguan psikosomatik diantarana, ningkatkeun tekanan darah, tekanan kolesterol jeung trigliserida anubisa ngabalukarkeun kasakit jantung koroner.
2. Resistensi insulin jeung naekna gula darah anu bisa nyababkeun diabetes melitus atawa kencing manis.
3. Penyerapan tulang resorpsi anu bisa ngakibatkeun kasakit sendi jeung osteoporosis.
4. Turunna kadar hormon tetosteron jeung estrogen anubisa ngalemahkeun libido atawa sex drive.
5. Katahanna aktifitas imune anu bisa nyababkeun kasakit flu, demam, jeung kasakit infeksi sejenna.
6. Ngarangsang lobana lemak anu bisa nyababkeun menyebabkan obesitas.
7. Turunna sistem neuro transmitter otak anubisa ngurangan daya ingetan atawa konsentrasi.
8. Ngageserna neuro transmitter kimia di otak kaasup dopamin jeung serotomin anu bisa nyababkeun depresi, rasa hariwang anu kaleuleuwihi jeung gangguan kana watek.
9. Ngariutna sel-sel otak anu bisa ngabalukarkeun efek jangka panjang nyaeta alzeimer atawa pikun berat.
Ratna Juwita, Staf Pengajar Psikolog Sosial ti Universitas Indonesia, netelakeun lobana caleg gagal anu ahirna beunang ku depresi disababkeun ku rasa  kakuciwaan anu gede.
"Aranjeunna tos ngainvestasikeun waktu, energi sareng biaya nu ageung, tapi gagal dina sadinten. Harepan luhur anu gagal saharita téh nyababkeun depresi anu berat."  pokna
Nurutkeun Ratna, tiap jalma boga katahanan fisik jeung psikis anu beda-beda. Pikeun jalma anu katahanan psikisna lemah rentan pisan beunang ku depresi.

Kepala Dinas Kesehatan Jawa Barat, dr. Hj. Alma Lucyati, M.Kes, M.Si, MH.Kes, miharep ka sakabeh masarakat sangkan sagancangna lapor jeung bawa ka rumah sakit, saupamana aya kulawargana anu karandapan kasakit gangguan jiwa.

“Teu kedah ngaraos isin upami aya kulawarga urang anu karandapan kasakit jiwa, tapi kedah saenggalna dicandak ka layanan kasehatan,” ceuk dr. Alma.

Nurutkeun Alma, lengkah ieu perlu diterapkeun ka sakabeh masarakat utamana dilingkungan kulawarga, minangka tarekah dina tindakan awal sarta langsung dibere ubar ti patugas layanan kasehatan.

“Masarakat tiasa dicandak ka Puskesmas, kumargi sadaya Puskesmas anu aya di Jawa Barat téh jumlahna 1.050 sareng tos tiasa ngalakukeun deteksi dini kana kasus kajiwaan di masarakat. Cekap 2 menit pamariosan, patugas tos tiasa gaduh diagnosa sacara awal,” pokna jentre.

Dumasar kana laporan ti Puskesmas nurutkeun dr. Alma Lucyati, kasus ayana gangguan kajiwaan di masarakat anu asup kana kategori gejala berat leuwih saeutik dibandingkeun jeung gejala ringan.

“Tina 465.975 rebu kasus anu karandapan gangguan kajiwaan, mung saukur 100 jiwa anu ngarandapan gangguan kajiwaan berat,” pokna deui.

"Nurutkeun data Riskesdas 2013, Jawa Barat kacatet gaduh 72.000 pasien gangguan jiwa sareng 10.000 di antarana kantos dipasung. Pamarentah daerah nuju tatahar dina ngagarap konsep anu tujuanana ngajadikeun Jawa Barat bebas tina masalah kasehatan jiwa ngalangkungan kabijakan, teknis persiapan rumah sakit jiwa sarta tanaga kesehatanana. Hal ieu tiasa digarap sacara terintegrasi sareng komunikasi lintas pamarentah ti mimiti pamarentah puseur, Jawa Barat sareng pamarentah tatangga saperti DKI Jakarta, Banten, jeung Jawa Tengah," ceuk Dr. Hj. Alma Lucyati, M.Kes, Msi, MH.Kes, Kepala Dinas Kesehatan Jawa Barat.

Salah sahiji hahalang anu sering kajadian ku pasen kasakit jiwa téh nyaeta dina masalah ngakonsumsi ubar anu kudu sacara rutin. Hal ieu jadi pangrojong dimekarkeunana hiji konsep layanan kasehatan jiwa Relapse Prevention Centre di Cirebon.

Dr. Suryo Dharmono, Sp.KJ(K) ngajentrekeun, "Sacara umum, Relapse Prevention Centre tujuanana kanggo masihan terapi, edukasi, sareng dukungan psikologis kanggo pasien sareng keluarga pasien sacara komprehensif sareng terintegrasi supados penderita kasehatan jiwa tiasa adaptasi kanggo lebet deui ka lingkungan masarakat." ***

Kirim Koméntar tina Facebook

Kirim Koméntar

Jenengan
Alamat Émail
Alamat Wéb
Koméntar
Serat Kodeu: