• Follow us on Twitter
  • Follow us on Facebook

Lain Sakola Mahal

Kénging Dede Syafrudin
Kintun kana Facebook

“Téréh barérés nyah, Lo.”

“Naon téa, Mang?”

“Sakola, Lo.”

“Hih, sakola mah moal aya bérésna, Mang.”

“Moal aya bérésna kumaha ari Alo?”

“Enya, kapan sakola téh nungtut élmu, nyuprih pangarti, tangtu moal aya bérésna, Mang. Salila hirup urang téh kapan kudu terus nyuprih pangarti.”

“Beu. Badis filsup baé Alo mah.”

“Héhéhé….”

“Maksud téh taun ajaran sakola nu ayeuna téréh bérés.”

“Oh.”

“Sarta tatahar nyanghareupan taun ajaran anyar.”

“Enya, Mang. Kuring gé keur néangan sakola keur si bungsu. Kapan taun hareup mimiti ka sakola dasar.”

“Kudu néangan sakola nu alus, Lo.”

“Enya.”

“Nu mahal, nu élit.”

“Maksudna?”

“Kapan biasana mah sakola nu alus téh sakola élit, tur biayana mahal, Lo.”

“Enya ceuk anggapan umum mah kitu. Sakola nu alus téh nu mahal biayana atawa bayaranana.”

“Ari anggapan nu teu umum?”

“Can tangtu sakola mahal téh alus, Mang.”

“Kitu nyah?”

“Buktina baé sakola Jakarta Internasional Scholl nu ramé diobrolkeun dina média massa, Mang, kapan bayaranana ogé nepi ka ngajuta cenah.”

“Ari kualitasna?”

“Kapan ramé diberitakeun yén para muridna kalah nandangan kajadian anu matak ngenes. Anu ngaruksak masa depanna, Mang.”

“Enya kétang, Lo.”

“Jadi mahal sarta maké label asing jeung élit téh hanteu jaminan, Mang.”

“Jadi nyakolakeun budak téh kudu ka sakola anu murah atawa anu haratis nyah, Lo?”

“Lain kitu maksudna, Mang.”

“Ari kitu?”

“Ari kuring mah leuwih condong kana anu natural, Mang.”

“Natural kumaha ari Alo, piraku kudu disakolakeun di kebon.”

“Maksud téh nu alami, henteu sagala diaya-ayakeun, atawa réa teuing label. Nu sawajarna téa, Mang.”

“Satuju, Lo.”

“Jadi budak téh rék disakolakeun di lembur atawa di kota, Lo.”

“Sarua baé di kota di lembur gé, Mang.”

“Har?”

“Enya nu wajar téa, rék di lembur rék di kota gé. Mun bisa mah nu boga dadasar agama jeung budaya.”

“Ngarah jaga bérés sakola téh boga tatapakan nu kuat nya, Lo?”

“Kitu pisan, Mang.”

***

Kirim Koméntar tina Facebook

Kirim Koméntar

Jenengan
Alamat Émail
Alamat Wéb
Koméntar
Serat Kodeu: