• Follow us on Twitter
  • Follow us on Facebook

Korban Bal

Kénging Dede Syafrudin
Kintun kana Facebook

“Beuki peuting beuki ramé, Lo.”

“Raraméan naon, Mang?”

“Raraméan nu lalajo bal. Piala dunya, Lo.”

“Oh.”

“Di mana-mana réa nu bagadang, Lo. Geus puguh diimah mah, di pos ronda, malah réa nu ngahaja lalajo bareng.”

“Enya, Mang. Opat taun sakali tuda.”

“Tapi orokaya….”

“Orokaya naon, Mang?”

“Sihoréng nyenangkeun diri sapeupeuting hareupeun tv téh aya résikona.”

“Baruk?”

“Cenah réa anu kabeurangan asup gawé alatan peutingna bagadang lalajo bal. Malah aya kajadian réa PNS di salah sahiji kota anu disetrap ku dununganana alatan teu ngalaksanakeun apél pagi.”

“Héhéhé.”

“Hih, kalah seuri.”

“Hartina dununganana teu resepeun kana bal, Mang.”

“Untung baé urang-urang mah pagawéanana ngalintrik, henteu ditutungguan ku jam ngantor.”

“Asa sararenang nyah, Mang.”

“Papadaning kitu….”

“Naon deui, Mang?”

“Ulah ngahanakeun teuing lalajo bal téh, Lo.”

“Har?”

“Lantaran salian ti korban pagawéan téh aya ogé nu nepi ka korban nyawa.”

“Baruk?”

“Di Tiongkok cenah, Lo, aya jalma anu maot alatan lalajo bal. Cenah mah éta jalma geus dua poé bagadang lalajo bal, nepi tuluy tiwas alatan kurang saré.”

“Gusti.”

“Matak najan resep gé ulah nepi ka kamalinaan. Kudu tetep ngajaga kaséhatan.”

“Yaktos.”

“Matak Mamang mah lamun peuting kurang saré, beurangna sok terus kurang beunta.”

“Mani raos kitu nyah, Mang.”

“Héhéhé.”

“Tapi di Afrika mah cenah leuwih parna, Mang.”

“Baruk?”

“Aya nu keur lalajo bal bareng tuluy dibom, nepi ka réa korban.”

“Gusti.”

“Untung urang mah cicing di nagara nu aman, bisa tenang lalajo bal.”

“Bener. Komo engké bulan puasa, aya batur saur, Lo.”

“Matak kudu sukur bal, Mang.”

“Sukur bal?”

“Maksud téh sukur nikmat, bisa lalajo bal bari aman tur séhat.”

***

Kirim Koméntar tina Facebook

Kirim Koméntar

Jenengan
Alamat Émail
Alamat Wéb
Koméntar
Serat Kodeu: