• Follow us on Twitter
  • Follow us on Facebook

Proyék Taunan

Kénging Dede Syafrudin
Kintun kana Facebook

“Maréma cenah, Lo.”

“Tukang dagang , Mang?”

“Enya, padagang taunan.”

“Taunan sok didagangkeun nyah?”

“Maksud téh nu dagangna taun kali, Lo.”

“Héhéhé.”

“Saban bulan puasa jeung lebaran masarakat urang jadi konsumtip, Lo. Hal sarupa kitu dimangpaatkeun ku para padagang anu daragang kabutuhan puasa jeung lebaran.”

“Yaktos.”

“Nu maréma dina bulan puasa téh di antarana tukang cangkaléng, Lo.”

“Nu dagang buah caruluk, Mang?”

“Enya. Sok sanajan dagangna taun kali, cenah kauntunganana kawilang gedé.”

“Bet hayang jadi tukang cangkaléng ari ningali maréma mah, Mang.”

“Hih, bet kabitaan. Pan urang mah geus boga propési anu pasti.”

“Na naon propési urang téh, Mang?”

“Tukang ngalintrik.”

“Heuheuy deuh.”

“Lian ti tukang cangkaléng, tukang sirop, tukang bungbuahan, jeung sajabana, aya deui anu maréma téh, Lo.”

“Tukang dagang naon, Mang?”

“Lain tukang dagang ieu mah.”

“Har?”

 “Ieu mah tukang proyék, Lo. Maksud téh tukang proyék jalan.”

“Na maréma naon?”

“Kapan cenah kiwari, jalur-jalur mudik, pangpangna jalur pakaléran, diaroméan. Hartina kapan maréma tah tukang proyék jalan téh.”

“Bener, Mang. Malah cenah ti saméméh datang bulan puasa gé geus diaroméan jalan di jalur mudik téh.”

“Taun kali téa, cara dagang cangkaléng, Lo.”

“Taun kali kumaha?”

“Unggal rék lebaran dioméan.”

“Nya alus wé dioméan mah. Sangkan patalimarga lancar, anu marudik tumaninah tur salamet nepi ka tujuan.”

“Enya alusna mah alus, ngan éta wé maké kudu unggal taun dioméan.”

“Pan mudikna ogé unggal taun, Mang.”

“Maksud téh na teu bisa nyieun jalan nu kuat, nu teu babari ruksak, sangkan ulah haben baé dioméan.”

“Hih, ari Mamang. Lamun teu ngoméan jalan atuh maranéhna moal boga bekel keur lebaran.”

“Enya ari ku kitu téana mah.”

“Kudu dipikiran carana, kumaha sangkan jalan bisa alus tur awét, tapi nu garawéna ngoméan jalan ogé boga bekel keur lebaran.”

“Enya, kudu kumaha nya?”

“Piraku kudu pipilueun dagang cangkaléng mah.”

“Emh.”

***

Kirim Koméntar tina Facebook

Kirim Koméntar

Jenengan
Alamat Émail
Alamat Wéb
Koméntar
Serat Kodeu: