• Follow us on Twitter
  • Follow us on Facebook

Pendatang

Kénging Rumpaka
Kintun kana Facebook

“Di Cimahi jeung sababaraha kota séjénna, Mang.”

“Kumaha, Lo?”

“Réa warga anu keuna ku razia yustisi cenah, Mang.”

“Kutan?”

“Maranéhna anu teu boga surat katerangan tinggal sementara réa anu keuna ku razia téh.”

“Beu.”

“Réréana maranéhna cicing di tempat-tempat kos atawa di imah kontrakan.”

“Rék ngadon naréangan rejeki di dayeuh tangtuna maranéhna téh, Lo.”

“Ja heueuh.”

“Pasualan pendatang atawa kaom urban mémang teu weléh jadi pasualan di saban kota gedé, Lo.”

“Bener, Mang. Pasualanana horéng henteu bisa tuntas ku operasi yustisi.”

“Pasualan ékonomi nu jadi marga lantaranana mah, Lo. Lamun ékonomi di pasisian masih kénéh kurang mekar, tanwandé kaom urban téh bakal terus merul ka kota. Padumuk kota ti waktu ka waktu wuwuh beuki padet baé.”

“Aya nu leuwih bahaya tibatan pasualan jumlah padumuk, tina réana pendatang téh, Mang.”

“Kitu nyah?”

“Dipikahariwang pendatang anu nyiruruk di tempat kos atawa kontrakan téh aya anu boga niat teu bener, Mang.”

“Kawas téroris nyah, Lo?”

“Enya, Mang. Kapan nu kitu mah tempatna téh sok pundah-pindah, ti kontrakan nu hiji ka nu lianna.”

“Matak kudu ati-ati lamun aya pendatang atawa jalma anyar téh, Lo.”

“Ati-ati dina harti urang ulah némbongkeun sikep anu goréng ka pendatang, tapi kudu tetep soméah.”

“Satuju, Lo.”

“Tah pasualan ati-ati téa, Mang.”

“Kumaha, Lo?”

“Urang kudu leuwih ati-ati sarta wanoh ka tatangga urang, lantaran kiwari keur usum ISIS, Lo.”

“Yaktos.”

“Lamun aya jalma atawa tatangga anyar nu gerak-gerikna matak curiga kudu waspada, Lo.”

“Matak gé, Mang.”

“Matak kumaha, Lo?”

“Aparat anu aya di daérah, utamana érté jeung érwé kudu bener-bener ngajalankeun pangumuman dina plang.”

“Pangumuman naon, Lo?”

“Tamu 1X24 jam wajib lapor.”

“Héhéhé…”

“Jadi lamun aya wargana anu kakatamuan ku pendatang leuwih ti sapoé sapeuting, aparat érté jeung érwé kudu sagancangna mariksa atawa nanya ku cara anu persuasip,sangkan anu ditanyana teu kasigeung.”

“Kitu pisan kuduna.”

“Enya ngaranna gé pendatang.”

“Kumaha, Lo.”

“Sok aya nu nyuriga, nu ngabagéakeun, malah aya ogé nu mikangéwa.”

“Geus umum masalah nu kitu mah, Lo.”

“Nu penting mah urang saréréa kidu waspada nyah, Mang.”

“Enya.”

****

Kirim Koméntar tina Facebook

Kirim Koméntar

Jenengan
Alamat Émail
Alamat Wéb
Koméntar
Serat Kodeu: