• Follow us on Twitter
  • Follow us on Facebook

Haleuang Tembang
Panineungan Presiden
ka Kota Kembang

Kénging Ensa Wiarna
Kintun kana Facebook
Mangle
Presiden SBY, tibelat ka Tatar Sunda [Potrét/Ilustasi: dok.pribadi]

Lagu “Malam Sunyi di Cipaganti”, jadi bukti. Eta rumpaka, nyatetkeun rasa, Presiden  neundeun katineung ka Kota Kembang. Ngan, naon untungna, mun para gegedén nagara mikacinta ibukota Tatar Sunda? ***

Istana Cipanas peuting éta, lir saksi tibelatna Presiden Susilo Bambang Yudhoyono (SBY) ka kota Bandung. Pangalamanan nu mangtaun-taun di kota Kembang, namper dina salah sahiji lagu sanggianana, “Malam Sunyi di Cipaganti.” Eta lagu, ceuk pamawa  acara,  panineungan SBY waktu peuting-peuting ngaliwat ka Jalan Cipaganti, Bandung. Eta jalan mun disorang ti puseur kota mah, ka lebah kalér, nu brasna Jalan Setiabudi, saterusna ka Lembang.

Presiden Susilo Bambang Yudhoyono (SBY) peuting harita, Malem Saptu, 8 Agustus, 2014  medalkeun album lagu anyar di Istana Cipanas, Cianjur, Jawa Barat. Eta téh album lagu nu kalima, da saméméhna gé kungsi medalkeun karya séjén, saperti 'Harmoni Alam Cinta dan Kedamaian (2011)', 'Ku Yakin Sampai di Sana' (2010), 'Evolusi' (2009), jeung  'Rinduku Padamu' (2007).

Inohong musik Indonesia Bens Leo nééelakeun,  SBY gedé katineungna kana dunya seni jeung budaya. Kitu téh lain ukur dina lalambé, da jeung prakna medalkeun karya boh lagu boh puisi.  “Muga-muga Bapa Presiden tetep aktif dina dunya seni sanaos tos teu janten presiden,” ceuk Bens nu kapapancénan nepikeun biantara dina éta acara.

Nu hadirna rempeg. Lian ti parapejabat Kabinet Indonesia Bersatu II, ogé dihadiran ku Gubernur Jawa Barat,  Ahmad Heryawan. Nya, tangtu deuih dieuyeuban ku para seniman, budayawan ogé artis, saperti Franky Raden, Lala Karmela, Taufik Ismail, Ebite G Ade, Dewi Yull, Renny Djajoesman, Afgan, Dwiki Dharmawan, Tohpati jeung Farisz RM.

Artis nu kapancénan ngahaleuangkeun lagu ciptaan SBY, di antarana, Vidi Aldiano. Inyana ngagalindengkeun lagu 'Jiwaku Terang di Malam Itu'. Eta lagu ciptaan presiden téh, kungsi dihaleuangkeun Vidi  waktu peutingan mieling ka-64  HUT RI, di buruan  Istana Kepresidenan, 2009.

Rumpaka  éta lagu disanggi presiden SBY taun 2007, dina sajeroning  lalampahan mulang ka lemah cai sabada ngahadiran  KTT APEC  di Lima, Peru. Saterusna, artis-artis séjén gé siligenti némbongkeun kaahlianana. Dua lagu anyar sanggian SBY disuguhkeun ka hadirin, saperti  'Malam Sunyi di Cipaganti' nu  diarransemen Tohpati, jeung  'Aku Bangga Jadi Anak Indonesia' nu dipasieup ku Purwa Caraka.

Lian ti  ‘peluncuran album’, ogé kumpulan puisi, 'Membasuh Hati di Taman Kehidupan'. Harita,  Taufiq Ismail macakeun puisi karya SBY nu judulna "Taksi Jakarta", "Reformasi Tidak Mati", jeung "Cahaya Islam".

Acara kawas kitu, ceuk Bens, biasa diayakeun ku presiden. Ngan, nu harita mah, cenah, lir pésta pipisahan jeung para seniman nu salila ieu ngarojong karya-karya SBY. Enya, apan dina taun ieu téh presiden mungkas pancén gawé jadi persiden RI.

 

Pangancikan Rasa

Lembur nu kaseuseup hawana nu kainum caina, ngalantarankeun matak tibelat. Antukna, éta padumukan téh lain ukur pangreureuhan raga, tapi deuih pangancikan rasa. Tina nu karasa ku pancaindra, namper dina haté, saterusna ngaliwatan olah batin, teu jarang nu ngawjud dina ungkara basa nu ngawirahma, saperti puisi atawa lagu. Tah, nya kitu deui lagu nu judulna “Malam Sunyi di Cipaganti” gé, lir tamperan saripati catetan nu kungsi kasorang mangsa ka tukang. Apan pok-pokanana gé,  “Hatiku pernah tertambat pada si dia. Di kota Kembang penuh nostalgia. Entah sewindu, atau satu dasawarsa, masa yang indah masa remaja.”

Mun Presiden SBY neundeun ka tineung ka Bandung atawa ka tempat-tempat di Jawa Barat, teu sing anéh. Apan, dumukna gé kungsi di Bandung, malah mangtaun-taun. Kituna téh, di antarana, lantaran kungsi  nyuprih élmu di Seskoad (1988-1989), ogé jadi Dan Brigif Linud 17 Kujang 1 Kostrad (1993-1994).

Mun mapay raratan mangsa kaliwat, Bandung jeung presiden RI, lir lauk jeung caina. Da, saban presiden gé ti mimiti Bung Karno nepi ka SBY, Bandung téh jadi tempat padumukanana. Presiden munggaran, apan tolab élmuna teh di ITB, kitu deui Presiden Suharto,  kungsi  meuseuh diri di Seskoad (Bandung). BJ Habibie kitu deui,  kungsi dumuk di Bandung lantaran kuliahna di ITB. Ditéma deuih ku Megawati Sukarnoputri,  kungsi dumuk di Bandung, da perenah kuliah di Unpad. Ari KH Abdurrahman Wahid (Gus Dur), tangtu wé wanoheun pisan ka Banudng téh, lantaran anjeunna mah apan Ketua PBNU nu di di Jawa Barat gé éta organsiasi téh loba panganutna. Atuh, Gus Dur gé méméh jadi persiden, ka Bandung (Jawa Barat) lir jadi jalan ka cai nepungan kaum Nahdiyin nu sumebar di tatar Sunda. Komo deui da Gus Dur mah nyobat pisan jeung KH Ilyas Ruhiyat, Kiyai teureuh Cipasung Tasikmalaya téh. Malah,  waktu Gus Dur jadi Ketua PBNU, KH. Ilyas Ruhiat jadi Rois Am PBNU.

Dalitna Presiden RI jeung Bandung, natrat nepi  SBY. Teu anéh mun dina acara-acara ‘rongkah’ partéy nu dipingpin ku SBY, saperti  Deklarasi,  Munas, jeung sajabana, biasa lumangsung di Bandung.

Ayeuna mangsana ganti pamingpin. Mun nu engeus-engeus Presiden RI dalit jeung Bandung, saterusna mah, kumaha lalampahan sajarah. Ngan, naon untungna keur rahayat Jawa Barat mah, mun Bandung (kungsi) jadi padumukan presiden? Mangpaatna mah, kari kumaha pihak-pihak ti Jawa Barat  nu boga karep bajuang keur kamajuan lemburna. Saperti  ceuk Prof. Dr. Asep Kartiwa, M.Si., Guru Besar Unpad, kamajuan Jawa Barat, gumantung ka pajabat pemda jeung wawakil rahayat nu makalangan di tingkat nasional. ***

Kirim Koméntar tina Facebook

Koméntar (3)

ruslan urang kiaracondong

Haturnuhun mangle..panggebrah manah nu kangen ka bandung ti sim kuring nu dipangumbaraan di tatar sulawesi..kendari

soleh ys

aehaeh manawi teh mangle t online...nembe kabuka ...nuhun mangle ...salam ti kec. Toili kab.banggai sulteng

Euis Sri m

Mugia panmingpin nu anyar tiasa ngadalit ka lembur parahyangan

Kirim Koméntar

Jenengan
Alamat Émail
Alamat Wéb
Koméntar
Serat Kodeu: