• Follow us on Twitter
  • Follow us on Facebook

Sajak Usép Romli HM;

Walungan

Kintun kana Facebook

1.

ngaheruk  neuteup cai ngembeng ngahideungan lukut

cimanuk piraku rék tilar nuturkeun citarum nu geus lawas bangkar

budah ngagulung ngungun cimanuk piraku rék nuturkeun

almarhum citarum

                          ****

2.

abringan widadari nitih katumbiri rék marandi di cisanggiri

tapi leuwi  pangancikan putri nu ngahaja sarumping ti langit

kiwari geuning geus leungit

hiji dua aya tapak liuh ulekanana

ngan teu canébrang hérang kawas ti heula

malah lecek kabina-bina

apan di girang aya pabrik aci salima-lima

miceunan onggok sangeunahna ka dinya

 

atas nama invéstasi

atas nama ngalegaan lapangan kerja

keur saratus dua ratus urang

kajeun ngabinasa jutaan flora jeung fauna

dalah manusa milu kababad tanpa daya

 

ti alam kasucian geunggeuik ketir para pohaci

nyeungceurikan cisanggiri

****

3.

curug jabung ngaguruh

gulidag badag teu paduli musim

ngijih halodo sarua baé

pangpalidan ti girang di dinya bahé

 

ngan  éta lalakon baréto

keur leuweung héjo ngémploh

mangrebu cinyusu tanggoh di tonggoh

ayeuna mah apan geus bulistir

gunung jeung pasir   terus-terusan digangsir

 

curug jabung kari bugang

saat sapisan

dalah batu jeung keusikna geus ledis

disasaak  napsu manusa nu beuki bengis

                           *****

Kirim Koméntar tina Facebook

Kirim Koméntar

Jenengan
Alamat Émail
Alamat Wéb
Koméntar
Serat Kodeu: