• Follow us on Twitter
  • Follow us on Facebook

Tepung Bakohumas Nasional 2014;

Ningkatkeun Ajen Humas
Ti Jawa Barat keur Nusantara

Kénging Rudi H
Kintun kana Facebook
Mangle
Tepung Bakohumas 2014 sa-Indonesia di Kota Bandung [Potrét/Ilustasi: rudi]

Luyu jeung parobahan, robah kaayaan pamaréntahna, robah politik jeung robah jamanna, pihak pamaréntah, hususna di jajaran kahumasan pamaréntah ogé kudu milu robah. Masarakat nu mingkin dieu mingkin kritis, tangtu loba mangaruhan kana cara némbongkeun sikep jeung nepikeun pamanggihna. Lantaran kitu, payus pisan upama kahumasan di pamaréntah ogé kudu ditingkatkeun ajénna. Geus puguh deui, ari tina pangaruh kabébasan pers mah, dalah kiwari ogé keur maceuh pisan mahabuna pengguna média sosial di internét. “Masarakat ayeuna leuwih kritis, ruangna henteu kawatesanan. Saha waé ogé bisa nepikeun pamadeganana. Ngan omat, boh pers atawa masarakat di jejaring sosial, disagigireun mawa mangpaat milu ngarojong kabébasan nepikeun pendapat, ogé tetep kudu boga étika,” cék Rudiantara, Mentri Kominfo RI waktu biantara dina acara tepung Bakohumas Taunan Tingkat Nasional taun 2014, di Hotél Haris, Jl. Pasirkoja Bandung, Salasa (25/11).

Lantaran masarakat gancang jeung babari nepikeun harepan ka pamaréntah dina ngalaksanakeun pamaréntahanana, cék ieu Mentri teureuh Sunda ogé, widang Humas di pamaréntahan kudu gancang ngabayuan, ngokolakeun jeung nyebarkeun informasi nu bener.

Dina mangsa pamaréntahan Jokowi - JK jinek, révolusi méntal téh kudu dilarapkeun. Tangtu, palebah dieu ogé, Rudiantara miharep sangkan anggota Bakohumas, kudu ngarobah pola pikir. “Ngarobah cara mikir kahumasan kacida pentingna. Ayeuna waktuna, bakohumas di tiap daérah kudu siap berinteraksi, ogé apal, mana nu bener, jeung mana nu saukur hayang dibenerkeun. Dipiharep ka payunna, nanjeur humas nu bernas, profesional jeung dipercaya informasina,” pokna tandes.

 

Pérs Daerah keur Nguatan Nusantara

Kota Bandung Jawa Barat meunang kasempatan jadi tempat tepung Bakohumas Taunan Tingkat Nasional taun 2014, lain tinimbangan kitu-kitu baé, tapi dumasar kana tinimbangan nu jelas. Nurutkeun Dirjen Informasi & Komunikasi Publik Kementerian Kominfo Freddy H. Tulung, lantaran Jawa Barat payus jadi tempat tepung Bakohumas sa-Indonesia. “Di Jawa Barat mah sagala aya, komplit. Saranana cukup, seueur potensi ogé jalmina soméah,” pokna.  

Kaunggulan Jawa Barat dina widang kahumasan, mémang matak pikareueuseun. Lantaran kitu, Jawa Barat gé kabiruyungan deui meunang Anugerah Media Humas taun 2014. Tapi sanajan kitu, tetep loba kénéh angen-angen ti Jawa Barat nu ngendatkeun harepan nu matak teu laas. Naon téa?

Nurutkeun Gupernur Jawa Barat nu harita ngiring biantara, kamekaran pérs kiwari sacara nasional mémang pikareueuseun. Tapi hanjakalna, teu pati témbong mawa pangaruhna kana kamekaran pers daérah. “Mangga, tiasa dititénan pihak-pihak nu ngarojong kamekaran pers saukur keur kamekaran pers di pusat wungkul. Ari nasib di daérah mah tacan menyat. Ka payun, kedahna mah aya tarékah keur ngamajukeun pers daérah. Para pangusaha sawadina, kedah ngarojong sangkan marasang iklan di pers daérah. Pami kitu, insya Alloh kamekaran pers daérah tiasa raharja ogé bakal témbong jati dirina,” cék ieu Gupernur Jawa Barat neundeun harepan sangkan budaya lokal (Sunda) nu milu mageuhan nusantara ogé, sangkan jadi perhatian pers nasional.

Acara tepung Bakohumas Taunan Tingkat Nasional tahun 2014 nu diayakeun ti tanggal 25-27 Nopember ogé euyeub kagiatan. Di antarana waé, ayana kagiatan diskusi panél ngeunaan peran kahumasan ti waktu ka waktu, ogé paméran nu nyajikeun peran jeung fungsi kehumasan ti tiap lembaga kementrian, lembaga kehumasan daérah ogé kahumasan swasta sa-Nusantara.***

 

 

 

 

 

 

 

 

 

 

Kirim Koméntar tina Facebook

Kirim Koméntar

Jenengan
Alamat Émail
Alamat Wéb
Koméntar
Serat Kodeu: