• Follow us on Twitter
  • Follow us on Facebook

Guguritan Dian Héndrayana;

Dangdanggula Sugan

Kintun kana Facebook

Sakiceupan naha ngiles deui

nitih cahya mapay kingkilaban

ka dinya ka tebéh kulon

tapakna anteng hurung

nyaréngcélak na layung kuning

naha teras ka mana

ngantunkeun nu liwung

janten geter dina manah

ceuk langit téh isukan rék datang deui

duka di lebah mana

 

Sakentrungan naha ilang deui

lungsur lirih na tungtung aweuhan

ngaléon na sédong towong

sorana semu ngalun

mipir leuwi babantar sepi

naha teras ka mana

ngantunken nu bingung

haliwu lebah mamaras

anteng palid ka hilir biheung ka mendi

duka nyangsang di mana

 

Sarénghapan naha leungit deui

mapay héar gupay dangdaunan

dipuntangan angin halon

seungitna manjang arum

humiliwir kaangin-angin

naha angkat ka mana

ngantunkeun nu gandrung

galécok boa jeung sugan

hayang teuing neuteup jirim widadari

demit di lebah enya

 

GBI, Desember 2014

 

Kirim Koméntar tina Facebook

Kirim Koméntar

Jenengan
Alamat Émail
Alamat Wéb
Koméntar
Serat Kodeu: