• Follow us on Twitter
  • Follow us on Facebook

Barang Séken

Kénging Dede Syafrudin
Kintun kana Facebook

“Hayang barang alus kudu mahal biayana, Lo.”

“Hih, nyaenya. Da nanaon ogé saluyu jeung harga, leuwih alus leuwih mahal, Mang.”

“Aya kalana urang ngaluarkeun duit gedé tapi meunang barang anu kurang alus, Lo.”

“Nu kitu mah disebutna téh katipu, Mang.”

“Oh.”

“Matak mun barang beuli téh kudu nyaho barang, kudu apal kana répérénsi harga, Mang.”

“Beu, ku gaya istilahna ogé, maka aya répérénsi harga sagala.”

“Héhéhé.”

“Papadaning kitu....”

“Kumaha, Mang?”

“Urang téh kudu néangan akal.”

“Satuju, Mang. Manusa mah pan hirupna ngandelkeun akal.”

“Jol satuju baé Alo mah, kapan Mamang téh can bérés ngomongna gé.”

“Ari kitu, kumaha Mang?”

“Urang téh kudu metakeun akal sangkan ku duit saeutik atawa modal leutik bisa boga barang alus atawa bisa ngagaya.”

“Babari atuh nu kitu mah, Mang.”

“Hih, babari kumaha ari Alo?”

“Meuli wé barang séken. Tangtu hargana moal mahal teuing kawas barang anyar. Uing ogé apanan kutak-ketik téh maké komputer séken.”

“Lain maké kumputer kantor nyah?”

“Héhéhé.”

“Balik deui kana perkara barang séken, Lo.”

“Kumaha, Mang?”

“Tangtu baé barang séken mah moal saalus nu anyar, Lo.”

“Teu jadi masalah, Mang. Nu penting pungsina jeung gayana. Pan bangsa urang mah parinter, barang urut gé bisa dirugal-rigel sangkan siga anyar deui.”

“Enya ku kitu téana mah, Lo. Kapan ayeuna ogé urang téh lamun hayang gaya bari kurang modal bisa meuli baju séken.”

“Pakéan impor urut téa, Mang. Biar murah asal gaya.”

“Ngan orokaya, Lo.”

“Orokaya kumaha?”

“Cenah mah pakéan urut téh réa ngandung baktéri jeung supa, Lo.”

“Kangaranana ogé barang urut dipaké batur atuh, Mang.”

“Hal sarupa kitu ngalantarankeun pamaréntah ngalarang kagiatan jual-beuli pakéan urut impor canah mah.”

“Bener ku kitu téana mah. Tapi nepi ka kiwari mun teu salah tacan aya masarakat anu komplén ku ayana éta pakéan séken téh, Mang.”

“Enya, idéalna mah pamaréntah téh bisa nyadiakeun barang-barang murah anu alus kualitasna. Ulah sagala marahal cara ayeuna.”

“Satuju, Mang. Alatan sagala marahal, antukna masarakat ukur kabedag meuli barang séken.”

“Emh,”***

Kirim Koméntar tina Facebook

Kirim Koméntar

Jenengan
Alamat Émail
Alamat Wéb
Koméntar
Serat Kodeu: