• Follow us on Twitter
  • Follow us on Facebook

Batu Kuda Alam
Éndah nu Nyamuni

Kénging Eep NR
Kintun kana Facebook
Mangle
Batu Kuda Manglayang [Potrét/Ilustasi: dok. eep]

Masih aya geuning tempat wisata anu éndah, tumaninah tur murah. Asupna waé ukur mayar 5 rébu saurangna. Tapi kumaha di jerona? Fasilitas naon waé anu aya di Batu Kuda?

Teu pati jauh lokasi objék wisata Batu Kuda téh. Dijugjug ti puseur Kota Bandung mah  ukur 20 km. Sedengkeun mun ti jalan raya Cibiru deukeut tugu wates Kota Bandung jeung Kabupatén Bandung anggangna ukur 5 Km. Tapi bisa ogé jalanna ti Cileunyi saperti para tukang dagang anu sok jualan di Batu Kuda. Cenah, ngareunah ti Cileu­nyi pikeun arinyana mah da leuwih deukeut. Ngan upama kana ojég kudu mayar 25 rébu. Jalan mah  henteu dihotmik, tapi alus najan leutik ogé. Hanjakalna, ti tempat meuli karcis ka lawang sakéténg Batu Kuda anu jarakna ukur 200 méteran masih dibalay. Atuh kandaraan mah rada ripuh sabab lian ti taringgul téh nanjak deuih.

Nurutkeun Entis Sutisna, purah ngajaga karcis di éta tempat, objék wisata Batu Kuda anu pernahna di lamping Gunung Manglayang Désa Cikonéng Kabupatén Bandung Jawa Barat téh legana kurang leuwih 2 héktar. Gegedéna éta tempat bogana Perhutani téh dipelakan ku tangkal pineus anu ngajarega nambahan asri jeung éndah matak betah anu resep di tempat sepi.

Tong ngarepkeun aya wanaha naon di Batu Kuda mah. Enya gé kasebutna tempat wisata, euweuh flying fox euweuh hiburan. Anu aya téh sora-sora ciri ti alam anu mawa rasa tengtrem, angin ngahiliwir jeung hawana anu matak seger kana pipikiran tur séhat kana awak.

Saméméh nepi ka Batu Kuda, upama jalanna ti tugu wates Kota Bandung jeung Kabupatén Bandung, urang bisa ngawaskeun sabagian pamandangan Kota Bandung anu lamun dina kaayaan cuaca keur hadé mah atra kacida. Anu matak lolobana anu arulin ka Batu Kuda mah barudak ngora anu resep kana olahraga jeung cinta ka alam.

“Seuseueurna mah anu ngadon kémping. Biasana dina waktos liburan seméster sakola,” ceuk Entis.

Atawa raména téh poé Minggu. Biasana anu ukur olahraga ngahajakeun leumpang bari jeung dina poé éta kénéh langsung marulang deui. Mun teu kitu Saptu pasosoré. Biasana éta mah sok mareuting di dinya atawa diteruskeun kémah di punclut Gunung Manglayang.

Teu kudu boga duit loba ulin ka Batu Kuda mah, sabab di jerona euweuh anu kudu dibayar deui, asupna ogé ukur mayar karcis 5 rébu sauranga. Rék sakeudeung atawa rék tuluy kémping ceuk Entis mah sarua waé. Tapi dahareun mah ulah hariwang, sabab di jero tempat wisata aya opat warung anu ngajual dahareun jeung inuman. Malah warung-warung téh bukana gé sapeuting jeput ari keur loba anu kémping mah.

 

Carita Batu Kuda

Sigana moal apdol upama ka objék wisata alam Batu Kuda henteu nepi ka batu kudana. Anggangna ti lawang  asup téh kurang leuwih 700 méter. Rada ngahégak ka nu teu biasa leuleumpangan mah. Sabab lian ti nanjak teu eureun-eureun téh ampir sapajang jalan ukur mahi keur saurangeun. Laleueur deuih upama tas hujan mah. Tapi balas capé lungsé bakal kaubaran mun geus jonghok jeung batu kudana.

Teuing kumaha bet disebut batu kuda, padahal mun disidik-sidik mah    éta batu anu gedé pohara téh bet siga bangkong raksasa keur ngadepong. Tapi aya caritana pangna éta batu di­ngaranan batu kuda. Ceuk dina tulisan anu dipasang dina wangunan deukeut lawang asup tur dipercaya ku masarakat sabudeureunana, cenah éta téh kuda tutunggangan Prabu Layang Kusuma sareng Prabu Layang Sari garwana anu tilelep kana embel tur jadi batu raksasa. Saterusna ku sabab kuda tutungganganana jadi batu, Prabu Layang Kusuma mutuskeun pikeun tatapa di éta tempat dugi ka pupusna. Anu matak nepi ka ayeuna éta kawasan wisata anu dikokolakeun ku Perhutani ti taun 1987 téh sok aya wé jalma anu ngahajakeun ngadon tatapa nurutan dina carita Prabu Layang Kusuma. Maksudna mah cenah anu harayang boga kamulyaan jeung kapangkatan. Tapi rék percaya atawa moal, intina mah ulin ka Batu Kuda béda jeung piknik ka tempat séjén. Hawana ngareunah, pamandangan éndah waragadna gé murah. ***

 

Kirim Koméntar tina Facebook

Kirim Koméntar

Jenengan
Alamat Émail
Alamat Wéb
Koméntar
Serat Kodeu: