• Follow us on Twitter
  • Follow us on Facebook

Nu Ngaligeuh jeung ISIS

Kénging Dede Syafrudin
Kintun kana Facebook

“Kiwari beuki réa jalma anu pangangguran, Mang.”

“Milampah hal-hal anu teu puguh gunana, iseng téa jeung basa Malayu mah nyah, Lo?”

“Ih, lain, Mang?”

“Har?”

“Ieu mah mah ngeunaan jalma-jalma nu teu boga gawé, Mang.”

“Oh, nu ngaligeuh?”

“Enya.”

“Mémang pasualan réana warga nu ngaligeuh téh mangrupa pasualan anu disanghreupan ku saban pamaréntahan, pangpangna di kota-kota, Lo.”

“Enya, Mang. Sok sanajan pamaréntah daérah geus réa ngayakeun rupa-rupa palatihan katerampilan ogé réa kénéh wé warga anu ngaligeuh teu boga gawé téh. Komo ayeuna dina kaayaan dolar jeung hahargaan sarwa mahal.”

“Hih, sing sabar wé, Lo. Kapan keur diiihtiaran, teu bisa ujug-ujug bérés wé pasualan warga nu keur ngaligeuh téh.”

“Nepi ka leuwih ti lima ratus urang cenah, Mang.”

“Saeutik atuh sakitu mah, komo lamun dibandingkeun jeung jumlah padumuk di pakotaan.”

“Ieu lain perkara jumlah warga anu ngaligeuh, Mang.”

“Harga?”

“Ieu ngeunaan jumlah warga nagara Indonésia anu kabaud ISIS, cenah jumlahna geus leuwih ti lima ratus urang. Malah sawaréh geus tiwas kasambut di pangperangan.”

“Beu. Na atuh tina ngobrol perkara anu ngaligeuh ujug-ujug luncat kana ISIS??”

“Lantaran aya hubunganana, Mang.”

“Aya hubunganana naon ari Alo?”

“Hubungan antara nu ngaligeuh jeung ISIS.”

“Enya, kumaha hubunganana?”

“Cenah mah jalma nu daék ngagabung jeung ISIS bakal dibayar mahal.”

“Walakadalah.”

“Bayaranana cenah mah leuwih ti lima yuta.”

“Ambuing.”

“Matak réa anu kapincut milu ISIS. Komo nu ngaligeuh mah.”

“Euleuh. Pan salila ieu anu geus kadesek ku kabutuh ékonomi téh réréana mah jadi TKW atawa TKI. Malah réa nu tadina hayang untung kalah jadi butung, disiksa tur digadabah ku dununganana di Arab.”

“Bener, Mang. Bari panghasilanana ogé jauh sahandapeun anggota ISIS. Matak batan ngaligeuh atawa jadi TKI bari disiksa ku dunungan, réa nu leuwih milih jadi anggota ISIS.”

“Naudubillahhimindalik.”

“Matak urang kudu terus ngadu’a, Mang.”

“Ngadunga kumaha, Lo.”

“Ngadung muga-muga pamaréntah sagancangna bisa ngungkulan pasualan réana masarakat anu ngaligeuh, sangkan maranéhna ulah kabawa ku sakaba-kaba, kabaud milu ISIS.”

“Amin.” ***

Kirim Koméntar tina Facebook

Kirim Koméntar

Jenengan
Alamat Émail
Alamat Wéb
Koméntar
Serat Kodeu: