• Follow us on Twitter
  • Follow us on Facebook

A PHP Error was encountered

Severity: Notice

Message: Undefined index: Baraya

Filename: modpublic/v_seratan.php

Line Number: 90

Rubrik


Ririwa Imah Dines

Kénging Asep H Sanudin (Ki Dalang)
Kintun kana Facebook
Mangle
SN1428505727.jpg [Potrét/Ilustasi: agus]

Di taun 2001-an akhir, simkuring kapapancenan ku dokter Hidayat nyekelan imah dinesna nu aya di gigireun Puskesmas Pangandaran. Pedah eta dokter teh geus nyieun gedong sigrong di lembur Babakan nu jauhna 10 menit ka arah Putrapinggan. Tapi mun pasosore manehna sok muka praktek di eta imah nu geus aya umuran. Jigana mah imah teh diwangun taun 70-an. Kacida geueumanana. Sagedengeunana aya gedeg garasi. Tukangeun imah ngageblang taneuh kosong upluk-aplak. Aya tutuwuhan jeung kekembangan di sabudeureunana. Jandela Puskesmas nu pernahna aya di Pananjung nu paeunteung-eunteung jeung Pasar Karangsalam teh katingali ti imah dokter.

‘’Sep, ini konci rumah. Tolong tiap hari dibersihkan ya! Ntar tiap akhir bulan saya kasih uang jajan. Hahahaha.....Itu buku-buku kedokteran kalau mau baca ambil aja. Gak apa apa. Hahahaha....’’ ceuk dr.Hidayat nu aslina ti Betawi nu nyaritana sok dibarengan ku seuri nyakakak.

Sok sanajan status kuring sarua meureun dititah jadi Pacalang (juru kaamanan/SATPAM imah) jeung Pasapon (tukang sasapu), tapi kuring mah teu mikir kitu. Nu penting hayang apal kumaha elmu dokter Hidayat mun seug ngubaran pasenna. Da nyana pisan, teu sirikna elmu pangaweruhna diketrukkeun kabeh ka simkuring. Elmu obat-obatan jeung ngadiagnosa panyakit kacangking pisan ku kuring. Katambah-tambah kuring teh cenah ceuk manehna alus mun jadi penerjemah mun seug aya pasen bule. Samalah kungsi meunang pamuji ti Dokter Hidayat di hareupeun babaturan kuring basa dines di Puskesmas.

‘’Wah, si Asep ini pinter bahasa Inggrisnya.’’ Pokna.

Kanyataanana da kitu, kuring kaasupna onjoy dina Bahasa Inggris. Nepika mun saban aya pasen bule datang, kuring wae nu jadi translatorna. Kapake tidituna mah.

Nu matak maruringkak bulu punduk mah carita si Uwa. Hiji juru masak urang Cikembulan nu ngabadega di imah dr.Hidayat.

‘’Uwa mah kungsi manggihan aya awewe deukeuteun dapur. Buukna panjang make baju sarwa bodas. Ngapung ngageuleuyeung.’’ Pokna bari ngiplik gegeber ngakeul sangu dina dulang.

‘’Lah, maenya Uwa?’’ ceuk kuring nempas.

‘’Eh, nu ngawenehan mah sok aya sakapeung mah di juru Puskesmas deukeuteun rohangan Perawatan.’’ Uwa nambahan carita.

Sajongjongan mah kuring teh teu percaya satai kuku-kuku acan. Komo nepi ka sieun ku jurig mah, pantrangan hirup. Mun cacak ngajenggelek si eta kunti rek ditumpakan meh kapok ceuk pamikir kuring. Unggal poe saberes dines, pasosore kuring sok sasapu. Tapi aya hawa nu beda karasana. Pangpangna mun geus asup ka rohangan dapur. Di dinya teh hawa asa leuwih tiis jeung karasa bulu punduk muriding. Keueung oge. Ah, ngabrangbrangkeun hate sakapeung mah sok ngahariring.

Samemeh hong adzan Magrib. Waktu sariyak layung kuring beberesih di WC nu aya nampeu gigireun kamar kuring. Kamar teh jigana kosong. Tara dicicingan. Kuring ngagoler dina kasur plastik nu lepek. Sarengse mandi, hoang muadzin di masigit. Asana kuring teh teu poho yen panto WC diselot. Sabot dianduk.

KOLOTRAK! (Sora panto WC muka sorangan)

Gebeg simkuring reuwas. Ret ka lebah panto. Enya we panto muka ku karep. Blus asup ka WC bari rarat-reret. Suwung euweuh nanaon. Sugan aya cakcak atawa angin nu ngagelebug. Teu gugur teu angin. Ras inget kana obrolan si Uwa. Biwir babacaan sabisa-bisa. Rengse sholat Magrib, teu sirikna lumpat sakalumpat lampet kaluar ti eta imah dines. Paingan we dokter Hidayat teh teu betaheun nyicingan eta imah da geuning jigana aya ririwa. Moal sieun ku pamolah sorangan mah.

Sajajalan kuring nikreuh leumpang aya kana dua kilona ngajugjug imah Mamang nu pernahna di Bulak Laut. Bari derekdek ngabenjer beaskeun naon-naon nu karandapan ku kuring. Tisaprak harita, kuring hees di imah dines eta sok dibaturan ku Mamang. Sok rame mun seug aya Mang Kohar mah. Ngobrol kaditu-kadieu. Bari jeung lalajo TV jeung disuguhan udud dua batang oge geus nyannyengnyong.

Mangkuk sababaraha minggu, kuring teu lila meunang pagawean. Wawancarana oge ka Jakarta. Cenah rek ditugaskeun ka Papua. Konci imah dines dibalikeun deui ka dokter Hidayat, sasatna can meunang duit sapeser-peser acan keur jajan nu kungsi dijangjikeun ku manehna. Ah, tapi lain eta nu disuprih. Elmu pangaweruh jeung pangalaman nu leuwih utama tinimang duit nu teu sabaraha. Tahun 2014 kuring ka Pangandaran nganjang ka Bibi nu aya di deukeuteun Cagar Alam. Ngahaja nyimpang ka Puskesmas Pangandaran wanci sareupna Maghrib. Bari lahak-lohok susuganan aya babaturan nu saperjoangan basa jadi Sukarelawan di taun 2001-an.

‘’Tiasa pendak sareng Oci, Ika, Teh Hernalis?’’ ceuk kuring ngabedega di hareupeun rohangan perawatan.

‘’Oci sareng Teh Ika tos ngalih ka Cikangkung. Teh Hernalis dines enjing. Dupi Aa saha?’’ Ceuk hiji juru rawat mencrong.

‘’Oh, abdi Asep. Kapungkur nu kantos Sukwan tahun 2001 di dieu. Salam kanggo sadayana nya.’’ Ceuk kuring.

Loba beungeut anyar di eta Puskesmas jeung pagawena oge teu warawuh jeung kuring. Puskesmas Pangandaran geus beda keur jaman 13 taun katukang jaman kuring dines. Duka dimana ayeuna pa Yadi, pa Uhin jeung teuing di mana laratanana si Herdaya, Solihin, kg Yudi nu kungsi sanasib gawe di dinya. *** Doha, 27 April 2015

Kirim Koméntar tina Facebook

Kirim Koméntar

Jenengan
Alamat Émail
Alamat Wéb
Koméntar
Serat Kodeu: