• Follow us on Twitter
  • Follow us on Facebook

H. Mohamad Surya

Panineungan Puasa
di Mancanagara

Kintun kana Facebook
Mangle
Di Masjid Kobe, Jepang [Potrét/Ilustasi: dok.pribadi]

Taun 1985/1986 harita keur boga pancén jadi dosén tamu di University Brunei Darussalam (UBD) salila sataun. Dina jero mancén tugas téh nambahan pangalaman ngalaksanakeun ibadah puasa di mancanagara di lembur batur jauh jeung kulawarga. Tapi sanajan jauh jeung kulawarga suasana sarua waé jeung di lembur sorangan sabab loba warga Indonésia anu ngumbara di ditu. Jadi henteu ngarumas sabab hampir mirip di lembur boh tina kadaharan atawa tatacara kahirupan. 

Brunei Darussalam (1985)

Sacara rutin sok bagilir ngalaksanakeun buka bareng anu dituluykeun shalat tarawéh di para kulawarga Indonésia utamana anu sasama dosén di UBD. Anu rutin mah sok buka di bumi Prof Winarno sakalian jadi imam shalat tarawéh, sarta ari balik dibekelan pikeun sahur. Kitu ogé para mahasiswa anu pituin kalayan daria tur daréhdéh soméah sok ngondang buka di kulawargana masing-masing anu suasana asa di lembur urang.

Sakapeung sok aya acara buka bareng di Kedutaan berjamaah jeung para warga staf kedutaan anu dituluykeun shalat tarawéh.  Lamun kabeneran teu aya acara buka bareng di warga Indonésia atawa di kedutaan atawa ondangan ti mahasiswa sok tarawéh di Masjid Agung Brunei ngahiji jeung warga satempat. Puasa ramadan di Brunei kalakonan salila tilu minggu. Alhamdulillah endah tur ni’mat puasa di Brunei Darussalam anu ngagem Islam dadasar kahirupan katut kanagaraan.

 

Vietnam (2000)

Tanggal 5-8 Desember 2000, ngaluuhan Konferensi ACT (Asean Council of Teachers) nyaéta hiji organisasi para guru ASEAN, anu diayakeun di kota Hanoi Vietnam. Harita téh mimiti pisan bulan  Ramadan. Buka munggaran téh di awang-awang dina pesawat Jakarta – Bangkok.

Mimitina mah asa hararésé sabab aya di nagara anu non-muslim. Tapi kabeneran ku panitia délégasi Indonésia ditempatkeun di hotél anu ngahiji jeung délégasi ti Malaysia. Ku kituna bisa diatur sahur jeng buka disaluyukeun jeung jadwal puasa, nya kitu ogé dina rupa dahareun disaluyukeun jeung kadaharan halal. Ngan urang Vietnam mah loba anu teu ngartieun naon puasa téh, éta waé loba urang Vietnam anu ngarasa teu ngartieun sawaktu acara dahar beurang.

Sanajan kitu puasa teu aya halangan harungan lancar waé, nya kitu ogé dina perjalanan mulang anu ngaliwatan Bangkok boh sahur boh buka teu aya halangan.

 

Thailand (2000)

Tanggal 12-19 Desember 2000 meunang kasempatan milu seminar jeung workshop ngeunaan “Child Friendly School” atawa sakola anu bersahabat jeung barudak. Éta acara téh diayakeun di Thailand di kota Bangkok sarta di Chiangmay kalayan disponsoran ku UNICEF.

Pamilon di Indonésia. aya tiluan nyaéta kuring dibarengan ku pamajikan, sarta Pa Zaénal Arifin ti Dinas Pendidikan Jawa Tengah. Ari pamilon séjénna nyaéta wawakil ti sababaraha nagara saperti Singapura, Malaysia, India, Thailand, Pilipina, Mongol,  Dina salila acara salapan poé di Thailand téh aya dina jero bulan Ramadah. Nambahan pangalaman puasa di mancanagara anu kabeneran di nagara non-muslim.

Ari urusan buka jeung sahur mah teu hésé sabab masak sorangan di hotél teu milu bareng jeung batur. Ngan anu hésé téh dina néangan kadaharan halal pikeun tajil atawa deungeun sangu. Lamun keur aya kunjungan ka sakola atawa ka tempat séjén sok disuguhan tapi kuring tiluan mah sok misahkeun diri. Alhamdulillah salila Ramadhan nepi ka mulang ka lembur salamet puasa lancar tur tamat.

 

Beijing, Cina (2002).

Tanggal 3-12 Nopember 2002 meunang pancén ti Kementrian Pendidikan Nasional pikeun ngalaksanakeun studi banding ngeunaan manajemen guru di Vietnam, Koréa, jeung Cina  Tanggal 10 Nopember acara di Cina sarta munggaran puasa Ramadhan.

Jadi puasa poé kahiji jeung kadua téh keur aya di Beijing. Kabeneran harita téh dibarengan ogé ku pamajikan, atuh teu hésé dina ngalaksanakeun boh sahur atawa buka sabab mekel béas sarta nyangu di hotél. Ngan kabeneran harita téh rek nyanghareupan musim dingin jadi puasana ngan sapuluh, ti pukul 5.00 nepi ka jam lima soré.

Dina puasa poé katilu mulang ka lembur ngaliwatan Singapur anu miang ti Beijing téh pasosore jam tilu, jadi buka téh di pesawat antara Beijing Singapur. Di Singapur nginep sapeuting di hotel Bandara Changi, jadi saur téh di Singapur. Mulang ka lemah cai tanggal 13 Nopember kalayan puasa lancar tur tamat, Alhamdulillah.   

 

Wellington, New Zealand (2009)

Tanggal 9-12 September 2009 salaku anggota DPD-RI meunang pancén studi banding ka New Zealand ngeunaan atikan. Kabeneran harita téh kakara dua poé ngalaksanakan ibadah puasa Ramadhan. Atuh satungtung acara téh bari ngalaksanakan puasa.

Miang ti Jakarta téh ninggang dina poé katilu Ramadhan. Buka téh di perjalanan sawaktu transit di Sydney Ustrali. Teu aya kasulitan dina ngalaksanakeun ibadah puasa sabab sakur anggota rombongan ogé ngalaksanakeun puasa. Kabeneran di hotél sakamar jeung Pa Sumardi anggota DPD wakil ti Riau jadi saur téh babarengan di kamar, da ari buka mah bareng jeung rombongan di réstoran.

Salila acara di Wellington New Zealand bari ngalaksanakeun ibadah puasa. Salah sahiji agenda acara nyaéta kunjungan ka KBRI, diantarana sakalian dina acara buka puasa tanggal 11 September di Islamic Center bareng jeung warga muslim di Wellington, sakalian dina acara mieling Nuzulul Qur’an.

 

Tokushima, Jepang (2015)

Bulan raadhan taun ieu (2015 atawa 1436H) kabeneran keur mancén tugas di Jepang tanggal 18–22 Juni 2015 di Naruto University of Education sarta ngaluuhan Konferensi ka 59 ICET (International Council of Education for Teaching) taun 2015.

Munggah atawa puasa poé kahiji ninggang dina tanggal 18 Juni anu dieusi ku acara kunjungan sarta dialog jeung Rektor NUE. Ari rombongan ti Bandung téh limaan nya éta kuring anu dibarengan ku Andri jeung Elang, tuluy Pa Heris sarta Pa H. Olih Komarudin ti STKIP Siliwangi, ditambah 13 urang rombongan ti Universitas PGRI Adibuana Surabaya.

Dina poé kahiji saur téh jam dua peuting sarta buka bareng jeung rombongan ti Surabaya jam 19.17. Jadi puasa téh salila 16 jam, lumayan matak jadi tantangan ujian kaimanan. Alhamdulillah puasa lancar saur sarta buka di kamar hotél teu hésé sabab mekel béas tur lalawuhna.

Pa KH Olih jeung Andri sarta Elang mah kungsi shalat Jumaah di Masjid Tokushimasarta paamprok jeung papada muslim ti Indonésia. Salila ngalaksanakeun ibadah puasa di Tokusihima manggih rupa-rupa kani’matan sarta pitulung Allah SWT.

Buka pamungkas di bandara saméméh mulang ka lembur di hiji réstoran anu nyadiakeun kadaharan halal.  Satengah jam saméméh waktu buka kadaharan geus nembrak dina méja. Aduh keselna bari lapar tur halabhab nungguan buka bari dahareun aya di hareupeun. Ceuk Pa KH Olih mah ieu ujian anu kacida beuratna sabab satengah jam karasana asa lila dibandingkeun jeung 15 jam satengah. Alahmdulillah lancar, satuluyna sahur dina pesawat jam 12.00 peuting dina perjalanan ka Kualalumpur. Nepi ka Bandung jam 12.00 Alamdulillah tamat puasa.

Tina pangalaman panineungan anu dipedar di luhur beuki yakin yén ku kakuatan iman mah puasa boh keur budak atawa dina safar kaasup di mancanagara bisa salamet. Allah SWT mah salawasna nangtayungan sarta moal ngabeuratkeun ka umatNa anu iman tur taqwa. Muga-muga Allah napi sagala ibadah sarta maparin gajnjaran sakumaha anu dijangjikeun ku mantenNa. Amin.***

Kirim Koméntar tina Facebook

Kirim Koméntar

Jenengan
Alamat Émail
Alamat Wéb
Koméntar
Serat Kodeu: