• Follow us on Twitter
  • Follow us on Facebook

Rita Tila;

Pogot ku Album Anyar

Kénging Lin RN
Kintun kana Facebook
Mangle
Pogot ku Album Anyar [Potrét/Ilustasi: Lin RN]

Sanggeus albumna ‘Enjing Deui’ génjlong di masarakat tur pada mikalandep mikameumeut, kiwari juru kawih Rita Tila ngagarap deui album kawih panganyarna dina wanda pop. Lagu-laguna masih kénéh ngandelkeun lagu-lagu ti Daséntra (daya seni tradisi Sunda) sanggian Ubun Kubarsah jeung Gun Gunawi.

“Wow, pokona lagu-lagu dina album nu ieu mah dahsyat pisan,” ceuk Rita semu reueus basa ditepungan ku Manglé dina sela-sela rékaman di Studio Nining Méida, Babakan Priangan, anyar-anyar ieu, “Lagu-laguna matak pogot, seueur sénggol sareng galéong nu alanyar. Atuh dina ngahaleuangkeunana estu ngahudang kréativitas sareng improvisasi anu ageung tangtanganana.”

Piraku teu ngarasa reueus, dina éta album nu panganyarna téa, Rita ngahaleuangkeun lagu ‘Sindén Genit’ sanggian Gun Gunawi jeung ‘Segagang Impian’ sanggian Ubun Kubarsah nu digarap kalawan daria tur apik naker, béda tina warna pop nu geus aya. Komo dina lagu ‘Segagang Impian’ mah, Rita bangun nu total pisan ngahaleuangkeun lagu nu ngala sari-sari gaya dermayonan. Atuh kapan dina lagu ‘Sindén Genit’ mah deuih ingkang carogé, Réza Bachtiar, ngiring ngeusian ku pirigan mélodi gitar.  

“Lah pokona albumna éstu bénten ti nu sanés!” ceuk Rita nu kiwari keur sibuk nyusun skripsi pikeun nyangking gelar sarjana ti Jurusan Seni Musik UPI.

Basa Rita ngaluarkeun album ‘Enjing Deui’ sawatara taun katukang, masarakat hiburan di tatar Sunda teu sirikna ngeunteupkeun katineung nu gedé pisan kana éta album. Pangna kitu téh duméh garapan musikna digarap kalawan enya-enya make gaya ‘harmonia’. Ari gaya harmonia téh mangrupa racikan anyar dina kacapi pentatonik nu disetél kalawan husus pikeun ngawadahan lagu-lagu Sunda nu mibanda nada nu teu nyampak dina laras nu aya. Sihoréng éta gaya ‘harmonia’ nu digarap tur diwanohkeun ku Yadi ‘Piteuk’ Cahyadi cs., sakumaha nu nyampak dina album ‘Enjing Deui’ teu wudu dipigandrung tur ditarurutan méh ku sakumna seniman kacapian. Tah, dina album nu panganyarna ieu gé, Yadi Piteuk masih kénéh mapaésan ku késétan biola nu matak dédéngéeun téa.

“Ku raraosan, dina ngagarap album nu ieu mah abdi gé bet ngaraos mendakan hal-hala anu alanyar tur bénten, bari sesah ngungkabkeunana. Muhun, awahing ku lagu sareng komposisina anu luar biasa,” ceuk ieu indung ti Ratu (6) téh.

Lian ti lagu nu dua tadi, dina album nu panganyarna téh Rita gé ngahaleuangkeun lagu séjénna beunang nyanggi Ubun Kubarsah, nyaéta lagu ‘Paris Romantis’, ‘Bulan di Priangan’, jeung ‘Kawin Kontrak’.

“Neda pidu’ana, mugi-mugi taun ieu kénéh éta album tiasa rampung,” ceuk Rita. ***
 

 

Kirim Koméntar tina Facebook

Kirim Koméntar

Jenengan
Alamat Émail
Alamat Wéb
Koméntar
Serat Kodeu: