• Follow us on Twitter
  • Follow us on Facebook

Ngajak Balaréa
Ningkatkeun Ajén Bangsa

Kénging Ensa Wiarna
Kintun kana Facebook
Mangle
Ti kenca (Gupernur Jabar, Rektor Unpad sareng Pupuhu Mangle) [Potrét/Ilustasi: Lin RN]

Ngajak balaréa, ningkatkeun ajén bangsa. Carana, rupa-rupa, ngaayakeun riungan, gawé bareng jeung sababaraha pihak, ngabina masarakat, jeung sajabana. Kitu nu dilaksanakeun ku Universitas Padjadjaran (Unpad) mah. Éta léngkah jeung tarékah téh mangrupa wujud tina patékadan Unpad mikanyaah Jawa Barat nu ogé hartina ningkatkeun ajén bangsa. ***

Rupa-rupa tarékah Unpad némbongkeun kanyaah ka masarakat, témbong dina rupa-rupa kagiatan. Kawas dina silaturahim para tokoh Jawa Barat nu diayakeun ku Manglé, apan dihiap ku Unpad ogé. Atuh, tempat riungan gé di Kampus Unpad, di aula Unpad nu katelah Graha Sanusi Hardjadinata, Jalan Dipati Ukur, Bandung.

Upama pihak Unpad ngahiap pihak-pihak nu gedé katineungna ka Jawa Barat, ceuk Réktor Unpad, Prof. Dr. med. Tri Hanggono Achmad, dr., lantaran ngawangun bangsa téh teu bisa sosorangan atawa ukur ku sawatara pihak. “Peryogi ngahijikeun rupi-rupi poténsi nu aya di sabudeureun urang nu saterasna dimangpaatkeun sahadé-hadéna,” pokna waktu ngawangkong satutas acara silaturahim para tokoh Jawa Barat nu diayakeun ku Majalah Manglé.

Acara riungan inohong Jawa Barat meunang pangbagéa ti saban pihak. Nu milu ngabagéakeun éta riungan di kampus Unpad téa gé, sababara paguron luhur. Lian dideudeul ku Unpad, ogé ku ITB jeung Universitas Pasundan (Unpas) Bandung. “Upami poténsi nu aya di Jawa Barat boh potensi inohong boh poténsi para akademisi tiasa sasarengan dimangpaatkeun maksimal, tangtos bakal ageung mangpaatna,” pokna.

Satutas riungan, tangtu silih pikanyaho. Saterusna, masing-masing pihak ngalaksankeun pancén séwang-séwangan. Cindekna, ceuk Pa Rektor mah, kari diteruskeun kana lajuning lakuna sangkan puguh hasil tur mangpaatna.

Icikibung dina dunya atikan, réktor sadar pisan, loba kamampuhan Unpad nu bisa dimangpatkeun ku balaréa. Ku lantaran kitu, gawé bareng éta paguron luhur jeung pihak séjén gé mayeng dilaksanakeun. Tangtu, teu ngan ukur ngahijikeun kakuatan geusan ningkatkeun pangaweruh jeung kamampuhan, tapi deuih dipalar puguh karasana ku masarakat.

 

Ngajak Balaréa

Universitas Padjadjaran (Unpad) Bandung terus ngayakeun rupa-rupa tarékah geusan ningkatkeun daya saing bangsa. Upaya kitu téh, di antarana ngaliwatan gawé babarengan jeung rupa-rupa pihak, saperti jeung  Kementerian, Badan Usaha Milik Negara,  sektor industri,  jeung palaku  bisnis.

Upaya kitu  dilaksanakeun  2 Mei sawatara waktu ka tukang. Harita  Unpad paheuyeuk-heuyeuk leungeun jeung genep  BUMN, DPRD Provinsi Jawa Barat, ogé  Kementerian Pariwisata RI ngaliwatan  Forum Kolaborasi Pentahelix. Ari nu genep BUMN téa,  PT. Dahana, PT. Pegadaian, PT. Pos Indonesia, PT. Pindad, PT. Pelayaran Nasional Indonesia (Pelni), jeung  PT. Wijaya Karya.

“Forum ieu mangrupa  gagasan nu kacida hadéna. Dina ieu kagiatan,  Unpad ngaliwatan  Prodi Doktor Ilmu Manajemen gaduh kasempetan janten  katalisator sareng  dinamisator kolaborasi nu nepungkeun  lima pilar pamangku  kapentingan,” ceuk Rektor Unpad, Prof. Dr. med. Tri Hanggono Achmad, dr.

Panandatanganan  kasapukan  (MoU) gawé bareng  Pentahelix téa  dilaksanakeun  ku Rektor jeung  Ketua DPRD Jabar, Ineu Purwadewi Sundari, Direktur Utama PT. Dahana, F. Harry Sampurno, Dirut PT. Pegadaian, Riswinandi, Direktur Komersial dan Pengembangan Usaha PT. Pelni, Elifen Goentoro, Dirut PT. Pindad, Silmy Karim, Direktur Keuangan PT Pos Indonesia, Poernomo, sarta  Direktur SDM dan Pengembangan PT. Wijaya Karya, Yusmar Anggadinata.

Ari panandatanganan  Perjanjian Kerja Sama (PKS) antara Unpad jeung  Kementrian Pariwisata dilaksanakeun ku Dekan Fakultas Ilmu Budaya (FIB) Unpad, Yuyu Yohana Risagarniwa, PhD., jeung  Ketua Badan Sumber Daya Kementrian Pariwisata, I Gede Pitana, kalayan  disaksian  Réktor Unpad jeung Menteri Pariwisata, Dr. Arief Yahya.

Réktor nétélakeun, gawé bareng  Pentahelix éta geusan ngawujudkeun  Unpad minangka  transformative university  nu didéklarasikeun sawatara waktu ka tukang.  Cirina  transformative university téh ngawujudkeun rupa-rupa hal nu dilaksanakeun ku  Unpad sangkan mangpaat keur ngawangun masarakat ogé ngawangun gawé bareng  ‘interdependensi’ jeung rupa-rupa pihak.

 

Ngajak Patani

Universitas Padjadjaran, ngaliwatan  Lembaga Penelitian dan Pengabdian Masyarakat (LPPM) Unpad ogé gawé bareng jeung  PT Hero Supermarket Tbk. Éta kagiatan téh  geusan ningkatkeun kamampuhan patani lokal  Ciwidey, Kabupaten Bandung, Jawa Barat. Dina éta kagiatan, Unpad nepungkeun patani jeung palaku industri.

Gawé bareng kitu, témbrés dina  ‘peluncuran’ Progam Petani Binaan Unpad  jeung  PT. Hero Supermarket Tbk  7 April sawatara waktu ka tukang. Harita ogé ngembarkeun  mérek babarengan (co-branding) “Katata” nu hartina téh kaurus atawa kaatur. Éta ‘katata’ téh keur ngamérekan hasil sayur-sayuran para patani  binaan Unpad jeung  PT Hero Supermarket Tbk nu baris  dipasarkan di rupa-rupa  Hero Supermarket, Giant Ekstra, jeung  Giant Ekspress.

Director of Corporate Affair, Industrial Relation dan Risk Management PT Hero Supermarket Tbk, Arief Istanto, nétélakeun,  program gawé bareng ieu boga tujuan méré pasilitas, palatihan, ogé marengan patani dina ngokolakeun tatanénna sangkan ajén hasil tatanénna ningkat sarta payu di pasar nasional ogé luar nagri.***

Kirim Koméntar tina Facebook

Kirim Koméntar

Jenengan
Alamat Émail
Alamat Wéb
Koméntar
Serat Kodeu: