• Follow us on Twitter
  • Follow us on Facebook

Moh. Toha jeung Moh. Ramdan

Naha Pantes jadi Pahlawan Nasional?

Kénging Taufik Rahayu
Kintun kana Facebook

Dina raraga milangkala Manglé nu ka 60 taun, dina tanggal 10 November 2017 nu ogé unggal taun dipieling jadi hari pahlawan nasional, Manglé ngayakeun sawala ngeunaan Moh. Toha jeung Moh. Ramdan. Naon waé eusi sawalana? ***

 

Mohammad Toha jeung Mohammad Ramdan téh pahlawan ti Bandung. Duanana, nurutkeun sejarawan Prof. Nina Herlina mah pantes pisan meunang gelar pahlawan nasional, lantaran ku jasa-jasa duana dina masa revolusi.

“Ti taun 2000, Mohammad Toha ku sim kuring tos diajengkeun aya kana lima kalina janten pahlawan nasional,” ceuk Prof. Nina dina bubuka sawalana nu diayakeun di Museum Sri Baduga Jl. BKR No. 185 Bandung.

Ngan, hanjakal pisan, najan geus diajukeun lima kali ogé, Moh. Toha téh teu disatujuan ku pamaréntah pikeun jadi pahlawan nasional, lantaran, nurutkeun Prof. Nina deui, ti katerangan sabada ditolak téh, ngaduruk gudang mesiuna Moh. Toha di Dayeuh Kolot téh dianggap kurang sah jeung ‘sumir’.

“Padahal sim kuring gaduh data-data nu lengkep ngeunaan peristiwa ngabeledugna gudang mesiu ping 10 Juli 1946 nu divokalan ku Moh. Toha. Data eta teh kenging ti sababaraha saksi sajarah sareng kulawargana,” ceuk ieu guru besar Sejarah Unpad téh yakin naker.

Tokoh Jabar, Dr. (HC). Tjetje Hidayat Padmadinata nyarankeun yén pikeun ngarojong Moh. Toha, Moh. Ramdan, atawa warga séjénna nu gedé jasana ka bangsa jeung nagara jadi pahlawan nasional, sakabeh élémén masarakat kudu terus ‘ngangsreg’ ka pamaréntah daérah jeung pusat, “Kiwari mah, pami teu ngotot téh sesah disatujuanana,” ceuk Kang Tjetje.

Ari nurutkeun Acil Darmawan Hardjakusumah, loba warga Jabar nu layak pikeun jadi Pahlawan Nasional, saperti Inggit Ganarsih, Ali Sadikin, Lasminingrat, jeung réa-réa deui. “Mung ayeuna mah masarakat sareng pemda téh katawisna téh kalah caralik waé, teu aya tarékah-tarékah jinek nanaon sareng bangun nu kalah ngantosan putusan ti pamarentah puseur waé. Aya nu tihot-hat ngajengkeun sapertos Prof. Nina saparakanca, kalah kirang pisan pangrojongna,” pokna bangun nu kuciwa.

 

Ari nu ngagagas ieu kagiatan, Kang Uu Rukmana nu ogé Pupuhu Majalah Manglé nétélakeun yén ieu sawala téh pikeun nandeskeun jeung mikanyaho kumaha ari ketak kapahlawanan Moh. Toha jeung Moh. Ramdan pikeun jadi pahlawan nasional.

“Ieu sawala ogé boga tujuan kanggo ngawanohkeun deui jeung ngipuk kareueus  warga Jawa Barat ka para pahlawan nu tos toh pati jiwa raga kanggo kapentingan bangsa sareng nagarana. Ajén inajén bajoangna, tangtos tiasa dilarapkeun dina kahirupan sadidinten,” ceuk Kang Uu mungkas obrolan.

Ari ayeuna, aya dua belas pahlawan nasional asal Jawa Barat, diantarana: Abdul Halim, Achmad Subarjo , Dewi Sartika , Eddy Martadinata, Gatot Mangkupraja, Oto Iskandar di Nata, Zainal Mustafa, Noer Alie, Djoeanda Kartawidjaja, Iwa Kusumasumantri, Kusumah Atmaja, jeung Maskun Sumadireja.*** (tr)

 

# Laporan lengkap ngeunaan Sawala Moh. Toha jeung Moh. Ramdan, tiasa diaong dina Mangle Citak nu baris medal minggu payun

Kirim Koméntar tina Facebook

Kirim Koméntar

Jenengan
Alamat Émail
Alamat Wéb
Koméntar
Serat Kodeu: