• Follow us on Twitter
  • Follow us on Facebook

Skor ménbal

Kénging Dede Syafrudin
Kintun kana Facebook
Mangle
Lintrik 2709 [Potrét/Ilustasi: Agus Mulyana]

“Kotor pisan, Mang.”

“Kari nyeuseuh atawa kari ngumbah, Lo.”

“Nyéta hésé pisan diberesihanana, Mang.”

“Na naon nu hésé diberesihan téh, Lo?”

“PSSI, Mang.”

“Ambuing. Na naon nu kotorna, Lo?”

“Kompitisina, Mang. Boh Liga 1 boh Liga 2, komo liga nu leuwih handap.”

“Kotor ku tindakan pengaturan sekor nyah, Lo.”

“Bener, Mang. Réa nu ngarasa curiga aya pengaturan sekor dina sababaraha pertandingan. Malah nu jadi juara gé, réa nu curiga, geus diséting ti anggalna mula.”

“Henteu diusut nyah ku PSSI?”

“Ukur lalambé, Mang, alias ukur wacana. Basa-basi.”

“Kacida.”

“Bener, kacida Mang. Cenah, cek sababarah kaol, pengaturan sekor téh geus lila ngabudaya di PSSI jeung kleub-kleub di Indonésia.”

“Pantes atuh, Lo. Ari lalajo ménbal di urang sok loba anu katémbong teu normal, pangpangna dina hal kapamingpinan wasit.”

“Matak prihatin, Mang.”

“Pangaruhna, kualitas Timnas urang teu undak-undak. Komo taun ayeuna mah, ngagejrét pisan.”

“Kudu kumaha atuh, Mang?”

“Kudu terus diobrolkeun, Lo. Dina rupa-rupa média, sangkan maranéhna sadar, tuluy beberesih, ngayakeun panalungtikana ngeunaan pasualan pengaturan sekor. Dipariksa saha nu kabaud, tuluy ngaluarkeun tindakan anu tegas.”

“Mun teu sadar baé, Mang.”

“Minimal éraeun ari terus baé diobrolkeun dina rupa-rupa média mah.”

“Lamun teu barogaeun kaéra, Mang.”

“Tah éta mah hésé, Lo.”

“Hésé kumaha ari Mamang?”

“Hésé ngélinganana ari jalma geus teu boga kaéra mah, Lo.”

“Jadi, kudu dintepkeun wé sina sagenahna nyah, Mang?”

“Ih, ulah!”

“Har?”

“Mun bisa mah kudu aya gerakan moral jeung gerakan massa, sangkan PSSI daék beberesih.”

“Saha nu bergerakna, Mang?”

“Saha baé nu micinta olah raga maénbal, sarta boga cita-cita sangkan olah raga maébal di urang maju, tur bisa ngahontal préstasi di tingkat dunya, Lo.”

“Tuluy nu ngagerakkeunna?”

“Tokoh-tokoh nu mibanda kacintaan ka olahraga maén bal, tur boga cita-cita sangkan olahraga maénbal di urang maju, Lo.”

“Ari urang kumaha, Mang?”

“Urang mah pan tukang ngalintrik anu ngéwa kana tindakan ngatur skor, Lo.”

“Tapi ngarojong kana sagala tindakan pikeun ngaberesihan PSSI nyah, Mang?”

“Ja heueuh.”

***

Kirim Koméntar tina Facebook

Kirim Koméntar

Jenengan
Alamat Émail
Alamat Wéb
Koméntar
Serat Kodeu: