• Follow us on Twitter
  • Follow us on Facebook

NONOMAN BOBOTOH PERSIB

Kénging Yadi Karyadipura
Kintun kana Facebook

Olahraga maén bal geus dipigandrung ku masarakat Indonésia. Kaasup nonoman nu milu ngabobotohan boh ka Timnas atawa ka klep di wewengkonna séwang-séwangan. Sanajan dina kompetisi Liga 1 mah remen silih sigeung mélaan klep favoritna, tapi dina lebah ngabobotohan Timnas mah sapuk maraké jersey Garuda.

Ngabandungan paripolah Bobotoh Persib mah sakapeung sok matak kerung. Upamana baé nalika Timnas Indonésia maén ngalawan Thailand di Piala AFF 2018. Aya trending topik di Twitter hastag #ThailandDays nu nyaingan #TimnasDays. Nu mupujuhkeun kana hastag saingan éta téh taya lian ti Bobotoh Persib Bandung.

Mémang media sosial (medsos) mah kaulinan barudak jaman kiwari atawa kids jaman now. Nya tangtuna gé nu nyarieun hastag tandingan téh nonoman nu ngabobotohan tim Maung Bandung. Nu baroga waktu luang pikeun ngotéktak media sosial.

Maluruh kana akarna, kalolobaan ngabobotohan klep téh lantaran ‘fanatisme kedaerahan’. Fanatisme éta aya pakaitna jeung séké sélér nu nyicingan éta daérah. Nu ngadukung Persib Bandung tangtu urang Sunda. Kitu deui nu nyicingan wewengkon séjén. Bobotoh PSMS Medan tangtu urang Batak, Semen Padang dibobotohan ku teureuh Minang, ogé PSM Makassar meunang pangrojong ti sélér Bugis.

Lebah fanatisme kedaerahan aya kapaur. Lantaran fanatisme mawa anggapan mun anjeun lain balad kuring, nya anjeun téh musuh kuring. Dina dunya maén bal Indonésia, aya 4 kelompok nu katelah remen pagétréng. Bobotoh Persib Bandung jeung The Jakmania Persija Jakarta, ditambah Aremania Arema FC jeung Bonekmania Persebaya Surabaya.

Beuki riweuh lantaran nu pada mumusuhan téh ngabalad deui: Bobotoh aub jeung Bonekmania, The Jakmnia ngahiji jeung Aremania. Laju dua balad éta paheuyeuk silih jorag. Matak ulah hémeng mun 4 klep kasabit tanding, pulisi jeung tentara samakta pakarang lir mapag perang.

Naha Bonek jeung Aremania henteu akur, kapan sarua urang Jawa? Lebah dieu bahayana fanatisme nu heureut ukur saguliwek wewengkon. Sanajan kitu, aya sélér séjén nu sarua mikaresep klep di sélér séjén, contona baé aya Viking Distrik Jepara nu eusina pacampur antara urang Sunda jeung Jawa. Demi Viking téh ngaran kelompok Bobotoh Persib, nu ngélébétkeun bandéra Viking Persib Club (VPC).

VPC sumebar di mamana. Ogé geus nyaliara ka sakola-sakola. Lantaran nonoman nu kaeunteupan krisis identitas butuh wadah pikeun mudalkeun rasa nu marudah, nu pasalia antara kahayang jeung kanyataan. Lantaran hal éta, nonoman boga kamampuh, boga tanaga leuwih bedas, nu matak unggal réngkak paripolah kaciri nenggang jeung nyongcolang. Cara nyieun hastag di Twitter. Najan béda ti batur, tapi teu matak gimir. Najan disangka ngalawan nasionalisme, teu ieuh unggut kalinduan.

Nyieun hastag tandingan lain hiji-hijina cara Bobotoh Persib némbongkeun kaludeungna. Loba hastag ngalawan di Twitter tisaprak ditibanan sanksi nu kacida teu ilahar ku Komite Disiplin (Komdis) PSSI satutas laga kontra Persija Jakarta (23/9/2018). Bobotoh teu meunang nyetadion nepi ka réngsé Liga 1 2018. Balukar tina kajadian maotna Haringga Sirilia (23), suporter Persija, The Jakmania, dipergasa oknum Bobotoh. Cukup baé nu mergasana ditindak ku pulisi. Lantaran kajadian di luar area setadion.

Rasa teu adil téh ngeunteung kana kajadian nu tumiba ka Bobotoh Persib dina taun 2012. Minggu (27/5/2012), di Gelora Bung Karno, Jakarta, Bobotoh tiluan puput umur satutas dihurup ku puluhan The Jakmania. Nu ngahurup gé maké paneunggeul jeung alat seukeut. Tilu Bobotoh nu maot téh nyaéta Lazuardi (28), Dani Maulana (16), jeung Rangga Cipta Nugraha (22). Tiluananan maot di jero setadion. Tapi boh Persija atawa The Jakmania teu dikukumaha ku Komdis PSSI.

Leupas tina kateuadilan PSSI, urang bisa nengetan, yén korban téh nonoman. Kitu deui pelakuna gé kalolobaan nonoman. Siga oknum Bobotoh nu ngahurup Haringga Sirila. Aya nu umurna karék welasan.

Taya salahna nonoman ngabobotohan Persib . Aya wadah kréasi, contona tulisan dina sepanduk, “Ulah Koméok Saméméh Dipacok”. Tulisan éta sacara teu langsung ngawanohkeun kekecapan basa Sunda. Kitu deui kréasi koreografi 3 dimensi (Koreo 3D). Teu kaitung deui tulisan basa Sunda nu eusina ngadukung Persib Bandung, nu sumebar dina kaos.

Lebah dieu kudu aya pangaping. Sangkan nonoman manggih jalan pikeun ‘aktualisasi diri’ ku cara ngabobotohan klep. Ulah hayoh waé dihuapan doktrin ‘fanatisme buta’. Nu antukna mawa mamala boh keur dirina kitu deui klep nu dibobotohan ku manéhna.

Kirim Koméntar tina Facebook

Kirim Koméntar

Jenengan
Alamat Émail
Alamat Wéb
Koméntar
Serat Kodeu: