• Follow us on Twitter
  • Follow us on Facebook

LÉNGKAH NONOMAN MEKARKEUN BUDAYA JABAR

Kénging Yadi Karyadipura
Kintun kana Facebook
Mangle
Katumbiri Urban Village A [Potrét/Ilustasi: Yadi Karyadipura]

Jawa Barat beunghar ku budaya. Kabudayaan bisa nanjeur lantaran aya kadariaan lebah ngamumuléna. Mekarkeun kréasi téh jadi tarékah sangkan budaya bisa larap jeung mangsa ayeuna, nu ceuk babasaan mah ‘ngigelan jeung ngigelkeun jaman’. Kaum nonoman némbongkeun kamonésan mekarkeun budaya dina acara Pra – Event 2, Urban Village 2019, nu dilaksanakeun di Gedong Saté jeung Taman Lansia, Bandung (22/10). Naon waé nu dipidangkeunaa?

Pra – Évent 2 téh runtuyan kagiatan Urban Village nu dilaksanakeun ku prodi Ilmu Komunikasi, Fakultas Komunikasi dan Bisnis, Telkom University, Bandung. Saméméhna geus ngagelar acar Idea Festival (15 April 2019), jeung  Pra – Event 1 (30 April 2019). Laju nyorang Main Event nu dirarancang digelar bulan Novémber. Main Event jadi acara pamungkas Urban Village 2019.

Kagiatan nu dipupuhuan ku Bunga Rahmalia Putri téh geusan ngawanohkeun poténsi daérah di Jawa Barat. Taun ayeuna, Urban Village milih tujuh daérah, wincikanana Indramayu, Cianjur, Kuningan, Pangandaran, Subang, Tasikmalaya jeung Bogor. Di Aula Barat Gedong Saté, masing-masing daérah nepikeun préséntasi ngeunaan produk, sarta mintonkeun kasenian. Dipidangkeunana ku nonoman ti daérahna.

“Ti réngréngan nu aub dina ieu kagiatan téh ngalaksanakeun kampanye ka sakola-sakola. Ngajak milenial supados aya rasa mikanyaah, sareng ngarojong ngembangkeun poténsi daérahna,” pokna.

Hasil dina kagiatanana, ceuk Bunga, baris dikumpulkeun nu satuluyna ide molah kréasi budaya jadi profési. Ku cara kitu produk ékonomi krétif di Jawa Barat bisa ngaronjat.

“Upami badé ngembangkeun ide kedah gawébareng sareng lintas profési, di antawisna akademisi, pangusaha, pamaréntah, média, sareng komunitas. Média tiasa ngabantos dina nebarkeun hasil kagiatan,” ceuk éta mahasiswi angkatan 2017.

Kagiatan éta téh minangka tugas kuliah ngalarapkeun élmu ti sababara mata kuliah konsentrasi Marketing Communication. Arinyana gé ngagelar kampanye sosial nu dingaranan “Langkah Jawara Jabar”. Éta kampanye téh méré lolongkrang keur barudak disabilitas dina némbongkeun kamonésan. Salah sahiji nu midang téh ti siswa SLB Raharja Mandiri, Sumedang. Dua siswa ti sakola éta, ludeung nyanyi jeung maén kendang, mintonkeun lagu Sancang nu dihaleuangkeun ku Yayan Jatnika. 

Paméran Urban Village 2019 di Taman Lansia, Bandung (22/10/2019)

 

Urban Village 2019 medalkeun ngaran-ngaran nu nyuluran wewengkon, nyaéta Lentera Cianjur, Mustika Tasikmalaya, Kahirupan Bogor, Kemilau Subang, Indramayu Yuk, Jumpa Pangandaran, jeung Sora Kuningan. Mulyana ti Kemilau Subang nandeskeun yén kagiatan éta téh ngabantu ngawanohkeun hasil karya batik ganasan has Subang.

 “Subang téh teu acan kasohor ku produk batikna. Ngalangkungan kagiatan sapertos kieu, seueur nu wawanohan sareng batik subang.” Pokna.

Mitembeyan molah batik subang ti taun 2010, Mulyana geus muka galeri batik di Subang. Kréasi batik ganasan dipajang dina booth Kemilau Subang di Taman Lansia. Unggal daérah ngaropéa booth-na séwang-séwangan. Éta paméran téh mungkas kagiatan Pra – Évent 2 Urban Village 2019. (yadi)

 

Kirim Koméntar tina Facebook

Kirim Koméntar

Jenengan
Alamat Émail
Alamat Wéb
Koméntar
Serat Kodeu: